Sonarbag Bandhara Protest: बंधारा बांधण्यावरून सोनारबाग, उसगाव आणि खांडेपार नदीच्या मुर्डी बाजूला मंगळवारी तणावपूर्ण परिस्थिती निर्माण झाली होती. प्रियोळ आणि इतर भागांमध्ये पिण्याच्या पाण्याची गरज भागविण्यासाठी प्रस्तावित बंधाऱ्यात पाणी साठवून ते लोकांना पुरविणार असल्याचे जलस्रोत खात्याचे साहाय्यक अभियंता शैलेश गावडे यांनी सांगितले.

मात्र, सोनारबाग-उसगाव बाजू तसेच मुर्डी-खांडेपार येथील स्थानिकांनी यामुळे पावसाळ्यात घरात पाणी शिरेल या भीतीने बंधाऱ्याला कडाडून विरोध दर्शविला आहे.

या कामाला आज, मंगळवारपासून सुरवात होणार होती. त्यामुळे काल, सोमवारीच स्थानिकांनी याबाबत फोंडा पोलिसात जाऊन निवेदन दिले होते. तसेच या बंधाऱ्याला कडाडून विरोध करणार असून याचे बांधकाम कसे करतात पाहूच, असा इशाराही दिला होता. अगदी, पोलिस आणा किंवा मिलिट्री आणा, आम्ही तयार आहोत, असा पवित्रा स्थानिकांनी घेतला होता.

बंधाऱ्याच्या कामाला सुरवात करण्यासाठी अधिकारी येणार असल्याचे समजल्यावर त्यापुर्वीच स्थानिकांनी बंधाऱ्याकडे जाणाऱ्या रस्त्यावर ठाण मांडले. पावसाळ्यात घरात पाणी घुसेल, अशी भीती व्यक्त करत या बंधाऱ्याला जोरदार विरोध करण्यात आला.

खांडेपार नदीवर बंधारा बांधण्यावरून उसगाव आणि मुर्डी येथे तणावपूर्ण परिस्थिती असून नदीच्या दोन्ही बाजूला राहणाऱ्या स्थानिकांचा बंधाऱ्याला कायम विरोध राहणार असल्याचे स्थानिकांनी सांगितले.

दरम्यान, मुर्डी येथे मोठा पोलिस बंदोबस्त तैनात होता. महिलांची संख्या जास्त असल्याने महिला पोलिसही तैनात होत्या. कायदा व सुव्यवस्था बिघडू नये यासाठी फोंडा मामलेदार राजेश साखळकर मुर्डी येथे उपस्थित होते.