Vasco News : वास्को, छत्रपती शिवाजी महाराज, संभाजी महाराज तसेच असंख्य स्वातंत्र्य सैनिकांच्या शौर्य, योगदानामुळे आम्हाला आजचे चांगले दिवस पाहण्यास मिळत आहे. त्यामुळे त्यांच्या शौर्य, योगदानाची आठवण ठेवण्याची गरज आहे.

त्यांच्या पराक्रमाचा इतिहास पुढील पिढीला कळाला पाहिजे, असे प्रतिपादन आमदार कृष्णा साळकर यांनी येथे केले.

मुरगावचे आमदार संकल्प आमोणकर म्हणाले की, भारत देशाला जगभरात एक हिंदू राष्ट्र म्हणून ओळखले पाहिजे हा पंतप्रधान नरेंद्र मोदी यांचा प्रयत्न आहे.

आम्ही सर्वानी हिंदू धर्म घेऊन पुढे जाण्याची गरज आहे. राम मंदिर उभारण्याचे जे स्वप्न होते, ते मोदी यांच्या कार्यकाळात पूर्ण होत असल्याचे ते म्हणाले.

सडा-बोगदा मार्गावरील बामणाव्हाळी येथील राष्ट्रीय ध्रुवीय व सागरी संशोधन केंद्रालगत असलेल्या श्री दत्तात्रेय मंदिराच्या प्रांगणात उभारलेल्या छत्रपती संभाजी महाराजांच्या पूर्णाकृती पुतळ्याचे अनावरण आमदार साळकर व आमदार आमोणकर यांच्या हस्ते करण्यात आले.

याप्रसंगी अॅड. राजीव ढवळीकर, पवित्रक युवा कला मंडळाचे अध्यक्ष अजित कांबळी, प्रमुख वक्ते डॉ. विनय मडगावकर (शिवोली), किशोर मेस्त्री (मुंबई), नगरसेविका श्रध्दा आमोणकर, नगरसेवक अमेय चोपडेकर व इतर मान्यवर उपस्थित होते. अजित कांबळी यांनी प्रास्ताविक केले. त्यांनी संस्थेच्या कार्याची माहिती दिली.

अनावरण सोहळ्यानंतर पुतळ्यास दुग्धाभिषेक व पुष्पहार अर्पण करण्यात आले. यावेळी डॉ. मडगावकर यांचे व्याख्यान झाले. किशोर मेस्त्री यांनी एकपात्री प्रयोग सादर केला. रंगनाथ नाईक, अशोक शिंदे यांनी वैयक्तिक व सांघिक पदे सादर केली.