काणकोणातील वृक्षतोड प्रकरणी सभापती रमेश तवडकर यांच्या विरोधात दक्षिण गोवा वनपालाकडे तक्रार केलेल्या कॉंग्रेसचे नेते जनार्दन भंडारी व गोवा फॉरवर्डचे नेते विकास भगत यांच्यावर अब्रूनुकसानीचा खटला दाखल करण्याची घोषणा सभापती तवडकर यांनी मडगावात घेतलेल्या पत्रकार परिषदेत केली आहे.

काणकोणमध्ये वेगवेगळ्या प्रकारचे जुगार चालू आहेत, त्यात जनार्दन भंडारी व त्यांच्या साथीदारांचा हात आहे. तसेच शॅकवाले व लहान लहान दुकानदारांकडूनही हप्ते घेण्याच्या प्रकरणात त्यांचा हात आहे. या संदर्भात आपल्याकडे अनेक तक्रारी आल्याने, ही सर्व बेकायदेशीर कामे आपण बंद केली. त्यामुळे त्यांनी आपल्यावर नाहक आरोप करण्याचे सत्र आरंभिले आहे.

भारतीय जनता पक्षाच्या श्रमधाम योजने अंतर्गत गरीब विधवांना, अपंग लोकांना किंवा अगदी गरीब लोकांना अंत्योदय तत्त्वांवर घरे बांधून दिली जातात. पक्षाचे कार्यकर्ते सुद्धा या कामात सहभागी होतात. याच योजने अंतर्गत आपण कोणकोण व परिसरात 20 घरे बांधण्याचे काम सुरु केले आहे. हे जे लाकूड आपण बलराम चॅरिटेबल फाउंडेशनच्या सदस्याच्या नावावर घेतले, ते याच घरांसाठी असे स्पष्टीकरण तवडकर यांनी दिले.

व्यवस्थित चौकशी न करता, खरोखरच पाच ट्रक लाकूड होते का? याची शहानिशा न करता, लाकूड नेमके कोणत्या प्रकारचे, हे न पहाता, सभापतिपदावर असलेल्या व्यक्तीला विरप्पन संबोधणे, लोकांची दिशाभूल करणे, ही कारणे पुढे करून आपण जनार्दन भंडारी व विकास भगत यांच्यावर अब्रूनुकसानीचा खटला भरणार असल्याचे सभापती रमेश तवडकर यांनी जाहीर केले.

येत्या एक दोन दिवसाच वकिलाशी बोलून हा खटला न्यायालयात दर्जा केला जाईल असेही तवडकर यांनी सांगितले.