कळंगुट: आपल्या घराचा समृद्ध वारसा ज्या पीढीकडे देऊ पाहतो त्या पिढीला संस्कारांनी मंडीत करणे हे पालकांचे दायित्व आहे. मुलांवर उत्तम संस्कार होण्यासाठी मुलांची तेजस्विता वाढविण्यासाठी व वैदिक संस्कारांचा वारसा आपल्या गृहस्थाश्रमी सुरू होण्याची आवश्यकता आहे. बालपणीच सुसंस्कारांचे बीजारोपण करता येते, असे पद्मश्री विभूषित धर्मभूषण सद्गुरु ब्रह्मेशानंदाचार्य स्वामीजींनी आशीर्वचनातून मार्गदर्शन केले.

श्रीदत्त पद्मनाभ पीठ तपोभूमी संचालित संत समाज सांगोल्डा यांच्या यजमान पदाखाली पद्मश्री धर्मभूषण पूज्य सद्गुरू ब्रह्मेशानंदाचार्य स्वामीजींच्या दिव्य सान्निध्यात श्री देव बाबरेश्वर देवस्थान खोब्रावाडा कळंगुट समुद्र किनारी धर्मभूषण सद्गुरु ब्रह्मेशानंदाचार्य स्वामीजींच्या पावन सान्निध्यात सामूहिक उपनयन संस्कार समारंभ झाला.

यावेळी कळंगुट मतदार संघाचे आमदार मायकल लोबो, माजी सरपंच अविनाशी नाईक, पंच सदस्य दिनेश सीमेपुरुषकर, श्री रामचंद्र नाईक इत्यादी मान्यवर उपस्थित होते. या संस्कार समारंभाचे पौरोहित्य स्वामी ब्रह्मानंद वैदिक गुरुकुलच्या वैदिक विद्वानांकडून करण्यात आले.पूज्य स्वामीजींकडून उपनयन झालेल्या बटूंना उपदेश करण्यात आला. सूत्रसंचालन ज्ञानेश्वर पाटील यांनी केले.