सासष्टी: निवडणूक आयोगाने दक्षिण गोवा साठी नियुक्त केलेले मतदार यादी निरीक्षक संदीप जॅकीस यांनी गुरुवारी दक्षिण गोवा जिल्हा प्रशासन कचेरीतील सभागृहात बोलावलेल्या बैठकीत त्यांना मतदार यादीसंदर्भात अनेक प्रश्न विचारण्यात आले.

त्यातील एक महत्वाचा म्हणजे मतदार यादी २१ फेब्रुवारीला जाहीर होईल पण वगळल्या जाणाऱ्या मतदारांचे भवितव्य काय, या प्रश्नाला उत्तर देताना त्यांनी सांगितले की त्यांची नावे जोड मतदार यादीत समाविष्ट केली जातील. पण जर ही जोड यादीचा विचार न करण्याचा निर्णय झाला तर काय? त्यावर त्यांनी सांगितले की, यावर आपण काही ठोस सांगू शकत नाही. हा निर्णय निवडणूक आयोग घेईल.

शेकडो नावे वगळल्याची भीती

गुरुवारच्या बैठकीत संदीप जॅकीस यांनी दक्षिण गोव्यातील एसआयआर प्रक्रियेचा आढावा घेतला. ही त्यांची तिसरी भेट होती, या बैठकीला जिल्हा निवडणूक अधिकारी, ईआरओ, साहाय्यक एईआरवो, राजकीय पक्षांचे प्रतिनिधी उपस्थित होते.

आगामी नगरपालिका निवडणुकीसाठी सुधारीत मतदार यादी वापरली जाईल की नाही, यावर सुद्धा निवडणूक आयोग काय तो निर्णय घेईल, असे स्पष्ट केले.

शेकडो गोमंतकीयांची नावे मतदार यादीतून वगळण्याची भीती राजकीय पक्षांच्या प्रतिनिधींनी यावेळी व्यक्त केली. एसआयआर प्रक्रियेनंतर सुद्धा वगळल्यांची नावे त्यांनी योग्य कागदपत्रे सादर केल्यावर मतदार यादीत समाविष्ट केली जातील हे संदीप जॅकीस यांनी स्पष्ट केले.