Goa Assault Cases Report

मडगाव : मारहाणीच्या घटना वाढू लागल्या आहेत. मागच्या वर्षी २०२४ मध्ये दक्षिण गोव्यात अशा प्रकारच्या ७० घटना घडल्या.

त्यातील ६९ प्रकरणाचा पोलिसांनी तपास लावला. यातील काहीजणांवर न्यायालयात आरोपपत्र ही दाखल केले आहे. शुल्लक कारणांमुळेही मारहाणीच्या घटना घडतात.

अनेकदा मालमत्तेच्या वादातून अशा घटना घडतात असे पोलिसांना तपासात आढळून आले आहे. २०२३ मध्ये या जिल्ह्यात मारहाणीच्या ८० घटना घडल्या होत्या, त्यातील ७९ प्रकरणांचा तपास लागला तर २०२२ साली ७७ घटना घडून, ७७ प्रकरणांचा तपास पोलिसांनी लावला.

दोषी आढळल्यास एक वर्षापर्यंतची शिक्षा व दंड

मारहाणीच्या घटना पोलिस ठाण्यात नोंद झाल्यानंतर जखमीला त्वरित वैद्यकीय तपासणीसाठी इस्पितळात पाठवून दिले जाते. वैद्यकीय अहवाल आल्यानंतर पोलिस अशा प्रकरणात संशयितांवर गुन्हा नोंद करीत असल्याची माहिती एका पोलिस अधिकाऱ्याने दिली. न्यायालयात संशयित दोषी ठरल्यास त्याला एका वर्षांपर्यंतची शिक्षा व एक हजारांचा दंडाची कायद्यात तरतूद आहे.