South Goa District Hospital Margao Additional Security Guards

सासष्टी: दक्षिण गोवा जिल्हा इस्पितळात दररोज शेकडो रुग्ण येत असतात. ओपीडी व नोंदणीसाठीच्या विभागात रुग्णांचा व त्यांच्यासोबत येणारे नातेवाईक, मित्र मंडळीची संख्या जास्त असते. त्यामुळे इस्पितळात तोबा गर्दी होते, त्यामुळे ती गर्दी नियंत्रणात आणणे कठीण होत असते. परिणामी रुग्ण व त्यांचे नातेवाईक तक्रारी करू लागले आहेत. त्यावर उपाय म्हणून इस्पितळ प्रशासनाने आरोग्य खात्याकडे जादा सुरक्षा रक्षकांसाठीचा प्रस्ताव पुढे केल्याचे कळते.

दर दिवशी कमीत कमी वेगवेगळ्या उपचारासाठी नोंदणीसाठी १५०० रुग्णांची गर्दी इस्पितळाच्या तळमजल्यावरील प्रवेशद्वारात होत असते. रविवारची सुट्टी असल्याने सोमवारी जास्तच गर्दी झालेली दिसते. त्यामुळे इस्पितळात गर्दीच्या व्यवस्थापनाचा अभाव जाणवतो.

इस्पितळाचे वैद्यकीय निरीक्षक डॉ. राजेंद्र बोरकर यांनी आरोग्य खात्याकडे ज्यादा सुरक्षा रक्षकांची मागणी केल्याची माहिती मिळाली आहे. तसेच नोंदणी काउंटरवरही माहिती व तंत्रज्ञान खात्याकडून जादा कर्मचाऱ्यांची मागणी करण्यात आल्याचे कळते.

जागा काही वाढवता येत नाहीत, पण गर्दी व्यवस्थापनासाठी जादा सुरक्षा रक्षकांची व्यवस्था करणे शक्य असल्याचे डॉ. बोरकर यांचे म्हणणे आहे. सध्या आम्हाला रुग्णांना रांगेत ठेवण्याशिवाय दुसरा पर्याय नाही, असेही डॉ. बोरकर सांगतात.

काही दिवसांपूर्वी आरोग्यमंत्री राणे यांनी इस्पितळाला आकस्मिक भेट देऊन समस्या सोडवण्याचे त्यांनी जाहीर केले.