54th IFFI 2023: यंदाच्या इफ्फी महोत्सवातील काही चित्रपटांचे प्रदर्शन मडगावच्या रवींद्र भवनच्या सभागृहात होणार आहे. त्यामुळे भवनची दुरुस्ती, सुशोभीकरण आवश्यक असल्याने ३१ ऑक्टोबरपासून सभागृह बंद ठेवण्याचा निर्णय घेतला होता. त्यामुळे तियात्रिस्त भडकले होते.

मात्र, आता रवींद्र भवनचे सभागृह ६ नोव्हेंबरपर्यंत खुले केल्याची माहिती अध्यक्ष राजेंद्र तालक यांनी दिली आहे.

इफ्फीचे तांत्रिक अधिकारी ७ नोव्हेंबर रोजी रवींद्र भवनमध्ये चाचणी करणार आहेत. त्यानंतर दुरुस्ती व सुशोभीकरणाची दिशा ठरणार आहे, असेही तालक यांनी सांगितले.

तियित्रिस्तांना बोलावून किंवा संपर्क साधून त्यांना परिस्थितीची जाणीव करून दिली आहे. ज्या तियात्रिस्तांच्या तियात्रांचे तीन शो झाले आहेत,

त्यांना नंतर संधी देण्यात येणार आहे. ज्यांचे तीनपेक्षा कमी शो झालेले आहेत त्यांना आधी संधी देण्यात येईल.

जे सर्वप्रथम तारीख निश्र्चित करतील त्यांना प्रथम संधी देण्यात येईल, त्याचबरोबर त्यांनी 24 तासांच्या आत सभागृहाचे भाडे भरणे आवश्यक असल्याचे तालक यांनी सांगितले.