पेडणे : मांद्रेचे आमदार जीत आरोलकार यांच्या कार्यकर्त्यांनी केलेल्या मारहाणी संदर्भात संशयिताविरूध्द पोलीसांनी कारवाई न केल्यास आत्मदहन करणार, असा इशारा समाज कार्यकर्ते संजय कोले यांनी आज दिला. दुसरीकडे, या प्रकरणाची योग्य चौकशी करून निर्णय घेण्यात येणार आहे, असे पेडणे पोलीस ठाण्याचे निरीक्षक सचिन लोकरे यांनी पत्रकारांशी बोलताना सांगितले.

आमदार जीत आरोलकर यांच्या कार्यकर्त्यांनी मला माराहण केली व यासंदर्भात पोलीस ठाण्यात तक्रार करुनही त्याची दखल घेण्यात येत नाही याच्या निषेधार्थ काले यांनी आज पेडणे उपजिल्हाधिकारी कार्यालयासमोर धरणे आंदोलन केले.

या धरणे कार्यक्रमाला अखिल गोवा टॅक्सी असोसिएशनचे अध्यक्ष चेतन कामत, मांद्रे कॉंग्रेस गट समितीचे अध्यक्ष नारायण रेडकर, नागरिक भास्कर नारुलकर, उदय महाले, ॲड. प्रसाद शहापूरकर आदी विविध संस्थांच्या प्रतिनिधीनी पाठिंबा दिला.

आरोलकरांविरुद्ध बोललो म्हणून..

काले म्हणाले, मी मोरजी येथे टॅक्सी स्टॅंडवर बसलो असता शेखर म्हापसेकर व नरेंद्र शेटगावकर या आमदार जीत आरोलकर यांच्या कार्यकर्त्यानी मी आरोलकरांविरोधात बोलतो म्हणून माझ्यावर हल्ला केला व मला जीवंत मारण्याची धमकी दिली. मी पोलीस तक्रार दाखल केली.

या घटनेस अकरा दिवस होत आले तरी अजून पोलीस ठाण्यात त्यांच्या विरोधात एफआयआर दाखल झालेला नाही. पोलीस खाते नेमके कुणासाठी आहे ? मी व्यथीत झालो असून न्याय न मिळाल्यास मी आत्मदहनाचा निर्णय घेणार, असे काले यांनी सांगितले.