sand Smuggler : चोरट्या पद्धतीने रेतीची वाहतूक केल्याप्रकरणी डिचोली पोलिसांनी वेगवेगळ्या कारवाईत दोन ट्रक जप्त केले. दोन्ही ट्रकांच्या संशयित चालकांनाही पोलिसांनी अटक केली. शुक्रवारी मुळगाव आणि डिचोली शहर परिसरात पोलिसांनी ही कारवाई केली. न्हावेली येथून रेती भरून दोन्ही ट्रक महाराष्ट्रात जात होते, अशी माहिती मिळाली आहे.

या कारवाईमुळे डिचोलीत बेकायदेशीरपणे रेती व्यवसाय चालत असल्याचे स्पष्ट झाले आहे.

शुक्रवारी पहाटे साडेपाच वाजण्याच्या सुमारास मुळगाव येथे केलेल्या कारवाईत बेकायदेशीरपणे रेतीची वाहतूक करताना एजे-२११२ या क्रमांकाचा ट्रक अडविण्यात आला. या ट्रकमध्ये ६ क्युबिक मीटर रेती होती.

पोलिसांनी ट्रक जप्त करून कुडाळ येथील प्रथमेश गोविंद म्हादाळकर (वय-२६) या ट्रक चालकाला आटक केली. डिचोली पोलिस ठाण्याचे पोलिस उपनिरीक्षक अनिल पोळेकर यांच्या नेतृत्वाखाली पोलिस पथकाने ही कारवाई केली.

दुसऱ्या एका घटनेत डिचोली येथील कदंब बसस्थानक परिसरात बेकायदेशीरपणे रेती वाहतूक करताना जीए-०९-यू-०९५१ या क्रमांकाचा ट्रक धरला. या ट्रकातही ६ क्युबिक मीटर रेती होती.

ट्रक ताब्यात घेवून कुडाळ येथील सुनील दिगंबर शेमाडकर (वय-३६) या ट्रक चालकाला अटक केली. डिचोली पोलिस ठाण्याचे सहायक उपनिरीक्षक हरीनाम नाईक यांच्या नेतृत्वाखाली पोलिस पथकाने ही कारवाई केली.