Goa: शिवोली पंचक्रोशीतील अनेक रस्त्यांची मागच्या पावसाळ्यात धूप झाल्याने जागोजागी रस्त्यात खड्डे पडले होते, त्यामुळे शुक्रवारपासून शिवोली-चोपडे पुलावरील खड्डे बुजवण्याचे काम विशेष यंत्राच्या मदतीने सुरू होते.

तिळारी प्रकल्पाची नवी जलवाहिनी टाकण्यासाठी खोदण्यात आलेले खड्डे गेली तीन वर्षे तसेच पडून राहिल्याने शिवोली-हणजूण रस्त्याची अक्षरशः चाळण झाली होती. यावर आमदार दिलायला लोबो यांनी या भागातील रस्त्यांची कामे हाती घेऊन सर्वप्रथम शिवोलीत रस्त्यांचे नवे जाळे निर्माण केले होते.

दरम्यान, यंदा झालेल्या मुसळधार पावसामुळे हणजूण तसेच शिवोली पुलावरील रस्त्यांची पुन्हा धूप झाल्याने वाहनचालकांसह स्थानिक ग्रामस्थांना खड्ड्यांमुळे त्रास सोसावा लागत होता. दरम्यान, पावसाळ्यात पेडणे-बार्देशला जोडणाऱ्या पुलावर जागोजागी खड्डे पडल्याने दोन्ही बाजूंकडील वाहनचालकांना वाहने हाकताना कसरत करावी लागत होती. इतकेच नव्हे तर येथील पुलावर खड्ड्यांमुळे अनेकांना जीवही गमवावा लागला.