म्हापसा: शिवोली मतदारसंघात पेयजल विभागाने ५.६ एमएलडी क्षमतेचा जलशुद्धीकरण प्रकल्प अंशतः कार्यान्वित केला आहे. त्‍यामुळे स्‍थानिक रहिवाशांना मोठा दिलासा मिळाला असून त्‍यांची समस्‍या मार्गी लागली आहे.

तीन जलवाहिन्यांपैकी दोन जलवाहिन्यांमधून प्रक्रिया केलेले पाणी या प्रकल्‍पात सोडण्यात येत आहे. त्यामुळे हणजूण-वागातोर व शिवोली-मार्ना या प्रमुख भागांना पाणीपुरवठा सुरू झाला आहे. आसगावसाठी असलेल्या तिसऱ्या जलवाहिनीचे काम डिसेंबर २०२५ पर्यंत पूर्ण होण्याची अपेक्षा आहे.

शिवोली मतदारसंघातील दीर्घकाळ प्रलंबित असलेल्या पाण्याच्या समस्येचे निराकरण करण्यासाठी समर्पित जलशुद्धीकरण प्रकल्पाचा प्रस्ताव ठेवण्यात आला होता.

त्यानुसार, मुख्यमंत्री डॉ. प्रमोद सावंत यांच्या हस्ते व आमदार दिलायला लोबो यांच्या उपस्थितीत गेल्‍या वर्षी आसगाव येथे ८.१२ कोटी खर्चाच्या या ५.६ एमएलडी क्षमतेच्या प्रकल्पाची पायाभरणी करण्यात आली होती. पूर्ण कार्यान्वित झाल्यानंतर या प्रकल्पामुळे हणजूण, शापोरा, आसगाव, बादे आणि शिवोलीमधील ग्रामस्थांची पाण्याची समस्या सुटेल, अशी अपेक्षा आहे.

दरम्यान, जून-जुलै महिन्यात सार्वजनिक बांधकाम विभागाच्या अधिकाऱ्यांनी शुद्धीकरण केंद्राची प्राथमिक चाचणी केली होती. नमुना प्रयोगशाळेकडून मान्यता मिळाल्यानंतर पेयजल विभागाने हा प्रकल्प अंशतः कार्यान्वित केला आहे. परिणामी, बंदिरवाडो-शापोरा, हणजूण, वागातोर, स्मॉल वागातोर, दाभोळवाडो, बादे, वाडी व मार्ना परिसरात पाणीपुरवठा सुरू झाला आहे.

वर्ष अखेरपर्यंत प्रकल्‍प पूर्णत: मार्गी

प्रयोगशाळेकडून चाचणीला हिरवा कंदील मिळाल्यानंतर आम्ही ५.६ एमएलडी क्षमतेचा प्रकल्प अंशतः सुरू केला आहे. संपूर्ण प्रकल्प डिसेंबर २०२५ पर्यंत पूर्ण होण्याची अपेक्षा आहे. या प्रकल्पाशी तीन जलवाहिन्या जोडलेल्या आहेत. त्यापैकी दोन हणजूण लाईन व मार्ना लाईन कार्यरत आहे. तिसरी आसगाव लाईन डिसेंबरपर्यंत पूर्ण होईल. त्यानंतर संपूर्ण परिसरातील पाण्याची समस्या सुटेल, असे अभियंता जॉन पायस यांनी सांगितले.