Goa News: ‘सिंगल यूज’ (एकदाच वापरता येणारी) प्लास्टिक पिशव्यांच्या वापरावर बंदी असतानाही, डिचोली बाजारात या पिशव्यांचा बिनदिक्कतपणे वापर होत असल्याचे आढळून येत आहे. कायद्याने बंदी असलेल्या या पिशव्यांचा बाजारात आता सरार्सपणे वापर होत आहे.

एकंदरीत बाजारातील दृश्‍य पाहता ‘सिंगल यूज’ प्लास्टिक पिशव्यांवरील बंदीचा निर्णय फसल्यातच जमा आहे. या प्रकाराकडे दुर्लक्ष होत असल्याने विक्रेते आणि ग्राहकांचे आयतेच फावत आहे. सहा महिन्यांपूर्वी ‘सिंगल यूज’ प्लास्टिक पिशव्यांच्या वापरावर बंदी घालण्यात आली आहे.

राज्यात ही बंदी लागू झाल्यानंतर सुरवातीचा महिना-दीड महिनाभर ‘सिंगल यूज’ प्लास्टिक पिशव्यांच्या वापरावर बऱ्याच प्रमाणात नियंत्रण आले होते. अधूनमधून पालिका आणि प्रशासकीय यंत्रणेकडून दंडात्मक कारवाई करण्यात येत होती.

हळूहळू कारवाई मंदावली आणि पुन्हा सिंगल यूज प्लास्टिक बाजारात दिसू लागले. आता तर फळ-भाजी, मासळी आदी विक्रेत्यांकडे या पिशव्या पुन्हा उपलब्ध होत आहेत.

ग्राहकही जबाबदार

बाजारात फळ-भाजी किंवा मासळी खरेदी करण्यासाठी येणारे ग्राहक स्वतः पिशव्या घेऊन येत नाहीत. तेव्हा त्यांना पिशव्या द्याव्या लागतात. महागड्या पिशव्या देणे परवडत नाही. त्यामुळे सिंगल यूज पिशव्या वापरणे भाग पडते. असे बाजारातील एका महिला भाजी विक्रेतीचे म्हणणे आहे.