पणजी: सध्या राज्यातील कोरोना पूर्णतः नियंत्रणात असून, बाधितांचे प्रमाण अत्यल्प आहे. याशिवाय अधिकच्या उपचारासाठी रुग्णालयात भरती थांबली असून, गेल्या पंधरा दिवसांत कोरोनामुळे बळी नाही. असे असले तरी देशातील अन्य राज्यांमध्ये कोरोनाबाधित आणि बळींचे प्रमाण झपाट्याने वाढत आहे. कोरोनाचा पूर्व अनुभव लक्षात घेता राज्यात जून-जुलै महिन्यात कोरोनाची चौथी लाट येऊ शकते. मात्र, ती पूर्वीपेक्षा कमी धोक्याची असेल, अशी माहिती कोरोना कृती दलाचे सदस्य डॉ. शेखर साळकर यांनी दिली.

राज्यात कोरोना पूर्णपणे नियंत्रणात असला तरी ज्येष्ठ नागरिक आणि विविध कारणांनी आजारी असलेल्या रुग्णांनी काळजी घणे आवश्यक आहे. कोरोना प्रतिबंधक म्हणजे मास्क परिधान करणे, सामाजिक अंतर राखणे अशा प्रकारचे नियम कायम ठेवले पाहिजेत. दिल्ली आणि उत्तर प्रदेशात कोरोनाची संख्या झपाट्याने वाढत आहे. राज्यात पर्यटनाच्या निमित्ताने तेथील नागरिकांची मोठी ये-जा आहे. त्यामुळे राज्यातील धोका संपलेला नाही. मात्र, राज्यात झालेले लसीकरणाचे प्रमाण हे इतर राज्यांच्या तुलनेत अधिक असल्याने नव्याने आलेल्या कोरोना विषाणू संक्रमणाचा परिणाम तुलनात्मकदृष्ट्या कमी असेल, असेही साळकर यांनी सांगितले.