मडगाव: देशाची एकात्मता व अखंडता हाच ध्यास असलेले डॉ. श्यामाप्रसाद मुखर्जी हे प्रखर राष्ट्रवादी होते. त्यांचे जीवन कार्य व विचारसरणीचा भारतीय राजकारण आणि समाजकारणात आजही प्रभाव जाणवतो, असे उद्गार नावेलीचे आमदार उल्हास तुयेकर यांनी काढले.  रुमडामळ - दवर्ली येथे भाजप कार्यालयात आयोजित करण्यात आलेल्या डॉ. श्यामाप्रसाद मुखर्जी जयंती कार्यक्रमात प्रमुख पाहुणे म्हणून ते बोलत होते. भाजपच्या नावेली मंडळाचे अध्यक्ष परेश नाईक, सरचिटणीस दीपक सावंत, आदी मान्यवर यावेळी उपस्थित होते.  ( Shyamaprasad Mukherjee's Influence on Indian Sociology: MLA Ulhas Tuenkar )

डॉ. मुखर्जी एक उत्तुंग व्यक्तिमत्व होते. पहिले पंतप्रधान पं. जवाहरलाल नेहरू यांच्या मंत्रिमंडळात ते उद्योगमंत्री होते. उद्योगमंत्री म्हणून अल्पकाळातच त्यांनी आपली छाप पाडली होती. पण, देशाची एकात्मता आणि अखंडता सर्वोच्च मानणाऱ्या राष्ट्रवादी विचारसरणीच्या डॉ. मुखर्जी यांना नेहरुंची काही धोरणे न पटल्याने त्यांनी मंत्रीपदाचा त्याग केला. काश्मिरला लागू केलेले 370 कलम रद्द करण्यासाठी त्यांनी चळवळ उभी केली होती.

एक विधान, `एक देश में दो विधान, दो प्रधान व दो निशान नही चलेंगे` असा नारा देत काश्मिरमध्ये जाऊन त्यांनी आंदोलन केले. या प्रसंगी त्यांना अटक होऊन नंतर त्यांचे संशयास्पद स्थिती निधन झाले. देशाची एकात्मता व अखंडता यासाठी त्यांनी हे बलिदान दिले. पंतप्रधान नरेंद्र मोदी यांनी 370 कलम रद्द करून देशाच्या अखंडतेच्या बाबतीत मोठा निर्णय घेतला.

याचे बरेचसे श्रेय डॉ. मुखर्जी यांनी उभारलेल्या चळवळीला जाते असे तुयेकर यांनी सांगितले. आज भाजप हा जगातील सर्वात मोठा राजकीय पक्ष बनला आहे. भाजपचे मूळ रूप असलेल्या जनसंघाची स्थापना डॉ. मुखर्जी यांनी केली होती. राष्ट्रवादी विचारसरणीच्या पक्षाची भाजपला गरज असल्याची दिव्यदृष्टी त्यांच्याकडे होती, असे तुयेकर यांनी सांगितले.