Central Minister Shripad Naik: भाऊंनी गेल्या 25 वर्षांत मंत्री आणि खासदार म्हूणून केवळ गोव्यात नाही, तर संबंध देशात चांगले काम केले आहे. एक उत्तम व्यक्ती आणि शांत स्वभाव असलेल्या नाईक यांनी आपल्या पदाचा, तसेच जनतेचादेखील मान राखला आहे.

त्यांना उदंड आयुष्य लाभो अशी ईश्वरचरणी प्राथना करतो, असे उद्‌गार राज्यपाल पी.एस. श्रीधरन पिल्लई यांनी काढले.

केंद्रीय मंत्री तथा उत्तर गोव्याचे खासदार श्रीपाद नाईक यांच्या वाढदिवसानिमित्त बुधवारी (ता.४) राज्यपाल पी.एस. श्रीधरन पिल्लई यांनी नाईक यांच्या निवासस्थानी भेट देऊन त्यांना शुभेच्छा दिल्या. यावेळी राज्यपालांसोबत त्यांची पत्नी रिता पिल्लई याही उपस्थित होत्या.

भाऊंच्या वाढदिवसानिमित्त सकाळी मोफत आरोग्य चिकित्सा शिबिर ठेवण्यात आले होते. त्यावेळी मुख्य अतिथी म्हणून मुख्यमंत्री डॉ. प्रमोद सावंत उपस्थित होते. सायंकाळी ज्येष्ठ भाजप कार्यकर्त्यांचा सत्कार सोहळा ठेवण्यात आला होता.

या सोहळ्याला मुख्य अतिथी म्हणून राज्यपाल पिल्लई उपस्थित होते. राज्यपालांनी सायंकाळी पोहोचल्यानंतर भाऊंना पुष्पगुच्छ देऊन शुभेच्छा दिल्या. उत्तर गोवा जिल्हा पंचायत अध्यक्ष सिद्धेश नाईक यांनी राज्यपालांचे स्वागत केले.

श्रीपाद नाईक यांचे गोव्यासाठी मोठे योगदान आहे. त्यांच्या कारकि‍र्दीत अनेक विकासकामे झाली. अनेक वर्षांपूर्वी त्यांच्याशी संपर्क आल्यानंतर त्यांना जाणून घेण्याची संधी मिळाली होती. आता गोव्यात आल्यानंतर आमची मैत्री आणखी घट्ट झाली आहे. - पी.एस. श्रीधरन पिल्लई, राज्यपाल