डिचोली: लाखो भक्तांचे श्रद्धास्थान असलेल्या शिरगावच्या श्री लईराई देवीची जत्रा यंदा २१ एप्रिल रोजी होणार आहे. तर २२ ते २५ एप्रिलपर्यंत पारंपरिक कौलोत्सव होणार आहे. देवस्थान समितीचे अध्यक्ष दीनानाथ गावकर यांनी ही माहिती दिली.

शिरगावची श्री लईराई देवी म्हणजे भक्तांचे श्रद्धास्थान. भक्तांच्या हाकेला पावणारी देवी, अशी या देवीची ख्याती आहे. लईराई देवीचे गोव्यासह शेजारील अन्य राज्यांत मिळून ६० हजारांहून अधिक धोंड भक्तगण आहेत.

जत्रोत्सवाच्या काळात गोमंतकासह देश-विदेशातील मिळून लाखो भक्तगण देवीच्या दर्शनासाठी शिरगावात येतात. मात्र, गेल्या वर्षी घडलेल्या चेंगराचेंगरीच्या दुर्घटनेनंतर यंदा प्रशासन आणि देवस्थान समिती सतर्क झाली आहे.

गेल्या वर्षीची पुनरावृत्ती टाळून जत्रा निर्विघ्नपणे साजरी व्हावी, यासाठी विविध उपाय योजण्याचे काम सध्या सुरू आहे. जत्रोत्सवाच्या पार्श्वभूमीवर प्रशासकीय पातळीवरही बैठका घेण्यात येत आहेत.