फोंडा: शिगाव तुरीमरड येथील गावात बिबट्याचा हैदोस चालू असून अनेक पाळीव कुत्र्यांना त्याने फस्त केले आहे. शिगाव नागरीकांनी दिलेल्या माहितीनुसार गेल्या अनेक दिवसांपासून बिबटा रात्रीचा गावात येऊन पाळीव कुत्र्यांना फस्त करीत आहे.

सत्यवान खेडेकर, रुपेश प्रभू, शशिकांत वेळीप तसेच वाड्यावरील अन्य रहिवाशांच्या कुत्र्यांना त्याने पळवून नेऊन त्यांचा फडशा पाडला आहे. या संदर्भात वन खात्याच्या कुळे कार्यालयाला कळविले तेव्हा वन अधिकाऱ्यांनी या ठिकाणी येऊन या भागात पाहणी केली आहे.

या संदर्भात वन खात्याचे अधिकारी सचिन सावंत यांना विचारले असता त्यांनी सांगितले की, आम्ही या भागाची बारकाईने पाहणी केली आहे.शिकाराच्या शोधात भटकत तो गावात पोचला असण्याची शक्यता आहे. आम्ही सीसीटीव्ही मोशन कॅमेरा बसवून त्याचे निरीक्षण करणार आहे. पुढील कारवाई ज्येष्ठ अधिकाऱ्याच्या मार्गदर्शनाखाली होईल.

शिवोली आगरवाडा येथे एका विद्यार्थ्यावर बिबट्याने हल्ला केल्याची धक्कादायक घटना नुकतीच घडली होती. या हल्ल्यात विद्यार्थी जखमी झाला होता. हरमल येथील असफ निकोलस (वय २४ वर्षे) हा युवक गोव्यातील एका नामांकित हॉटेल मॅनेजमेंट कॉलेजमध्ये शिक्षण घेत होता.

बुधवारी रात्री तो स्कूटरवरून चोपडेहून आपल्या घरी हरमलला परतत होता. दरम्यान, आगरवाडा भागातील एका चढणीवर असलेल्या हॉटेलजवळ पोहचताच अचानक एका बिबट्याने त्याच्यावर हल्ला चढवला.