गोव्यातील कार्निव्हल पार पडल्यानंतर गोमंतकीयांना वेध लागतात ते शिगमोत्सवाचे. गोव्यातील कोणत्या शहरात कधी शिगमोत्सव साजरा होणार यांच्या तारखा जाहीर झाल्यानंतर मेळे, मिरवणुकीत सहभागी होणारे चित्ररथ यांची धावपळ सुरु झालेली आपल्याला पाहायला मिळाली.

बहुचर्चित अशा पणजी शिगमोत्सवाची परेड कधी होणार याबाबत बरीच उत्सुकता लागून राहिली होती. मात्र याविषयी एक महत्वाची माहिती समोर येतेय.

पणजी शिगमोत्सव परेड 11 मार्च रोजी पारंपारिक मार्गाने म्हणजेच '18 जून रोड'वर होणार आहे. पणजीत सध्या स्मार्ट सिटीचे काम सुरु आहे. मात्र असे असूनही शहरवासीयांच्या कामकाजावर कोणताही परिणाम न होता सर्व व्यवहार सुरळीत असल्याचे पणजीचे महापौर रोहित मॉन्सेरात यांनी म्हटले आहे.

तसेच शिगमोत्सवाच्या परेड बाबत आणखी माहिती हाती येतेय ती अशी की, शिगमोत्सवाच्या मिरवणुकीसाठी तसेच चित्ररथांच्या सादरीकरणासाठी रोषणाई आवश्यक असल्याने परेड संध्याकाळी 7 वाजता सुरू होईल, तसेच ध्वनिप्रदूषणाबाबत न्यायालयाच्या आदेशानुसार रात्री 10 परेड थांबवण्यात येईल असेही सांगण्यात आले आहे. पणजी शिगमोत्सव 7 मार्च रोजी होळी पलटवार उत्सवाने सुरू होईल आणि 12 मार्च रोजी संपेल.