सासष्टी: एसजीपीडीए घाऊक मासळी मार्केटमध्ये नवीन इमारत बांधून पूर्ण झाली आहे. कोल्ड स्टोरेज नसल्यामुळे व इतर काही बारीकसारीक गोष्टी पूर्ण न झाल्याने या इमारतीचे उद्‌घाटन रखडले आहे. मात्र, इमारतीचे उद्‌घाटन होण्यापूर्वीच तिथे मासळी विक्री सुरू झाल्याचे दिसून येत आहे व त्यामुळे सर्वत्र अस्वच्छतेचे सम्राज्य पसरले आहे.

पहाटे वाहनातून जी मासळी येते ती या इमारतीत उतरविण्याचे काम सुरू झाल्याची माहिती मिळाली आहे. त्याचे पुरावे म्हणजे त्या जागेत मासळीचे पाणी पसरले आहे. प्लास्टिक, प्लास्टिकच्या बाटल्या, थर्माकॉलचे तुकडे पडलेले आढळतात. नाले प्लास्टिक, बाटल्या व इतर कचऱ्याने भरलेले आढळतात.

तिथून जवळच साळ नदीच्या पाण्याचा प्रवाह वाहत आहे, तिथे थर्माकॉलचे तुकडे पडलेले आढळतात. या सर्व प्रकाराबद्दल नागरिक संताप व्यक्त करताना दिसत आहेत. ‘एसजीपीडीए’ने येथे व्यवहार करण्यास मान्यता तर दिली नाही ना, अशी शंका नागरिक व्यक्त करताना दिसत आहेत.

विजय सरदेसाईंनी वेधले लक्ष!

नवीन इमारतीचे उद्‌घाटन जानेवारी महिन्यात करण्याचा बेत होता; पण नंतर फातोर्डाचे आमदार विजय सरदेसाई यांनी अपूर्णावस्थेत असलेल्या या इमारतीच्या उद्‌घाटनास आक्षेप घेतला होता.

शिवाय कोल्ड स्टोरेजची व्यवस्था नसल्याने केंद्र सरकारकडून मिळू शकणाऱ्या २० कोटी रुपयांच्या अनुदानावर पाणी सोडावे लागणार आहे, असे सरदेसाई यांनी लक्षात आणून दिले होते.