फोंडा: एका अल्पवयीन मुलीवर बलात्कार केल्याच्या आरोपावरून म्हार्दोळ पोलिसांनी भोम येथील सादिक खान (वय २०) याला अटक केली आहे. संशयिताने या अल्पवयीन मुलीशी जवळीक साधून हा प्रकार केल्याचे उघडकीस आले असून अटकेत असलेला संशयित आणि पीडिता दोघेही बिगर गोमंतकीय आहेत.

भोम येथे भंगारअड्डा चालवणाऱ्या सादिक खान याने या अल्पवयीन मुलीशी मैत्री केली होती. या मैत्रीचा फायदा उठवताना सादिक खान याने या मुलीला फूस लावून आपल्या सोबत घेतले आणि तिवरे येथील आपल्या एका मित्राच्या खोलीवर नेऊन तिच्यावर बलात्कार केला.

ही मुलगी रात्री घरी परतली नसल्याने तिच्या कुटुंबियांकडून शोधाशोध केली असता दुसऱ्या दिवशी सकाळी ही मुलगी घरी आली. त्यानंतर तिच्याजवळ या प्रकाराची माहिती घेऊन पालकांनी म्हार्दोळ पोलिस स्थानकात तक्रार नोंदवली.

गेल्या मंगळवारी हा प्रकार घडला होता, त्यानंतर फरार संशयिताच्या मुसक्या म्हार्दोळ पोलिसांनी आवळल्या आणि त्याला अटक केली. म्हार्दोळ पोलिसांनी संशयित सादिक खान याच्याविरुद्ध पोक्सो कायद्याखाली गुन्हा नोंदवला असून याप्रकरणी अधिक तपास करीत आहेत.