Fire In Parra गोव्यात आगीच्या घटनांमध्ये दिवसेंदिवस वाढ होत असून मागील तीन-चार दिवसात सुमारे 15 ते 20 ठिकाणी आगी लागल्याच्या घटना घडल्या आहेत. दुकाने, फॅक्टरी यांच्या सोबतच जंगल, आंबा-काजू बागा यांसह मोकळ्या माळरानावर वणवे लागण्याच्या घटना घडत आहेत.

म्हापशा शेजारील पर्रा- आसगाव दरम्यानच्या जंगलात भीषण आग लागल्याचे वृत्त हाती आले आहे. ही आग सकाळी आठच्या सुमारास लागल्याची माहिती मिळाली आहे. ही आग विझवण्यासाठी आत्तापर्यंत अग्निशमन दलाचे 3 टँकर घटनास्थळी दाखल झाले असले तरी अद्याप आगीवर नियंत्रण मिळवता आलं नाहीय.

दरम्यान दुपारी रखरखत्या उन्हात भडकलेली ही आग नियंत्रणात आणताना अग्निशमन दलाच्या जवानांना कसरत करावी लागतेय. काल सायंकाळी अचानक आयआयटी डोंगरावर आग लागल्याची घटना घडली होती. या आधी सांगे भागात एकाच दिवशी चार ठिकाणी आग लागून मालमत्तेची हानी झाल्याची नोंद करण्यात आली आहे.

तसेच काल कारापूर येथील लोकवस्तीजवळ माळरानाला आग लागण्याची घटना घडली असून या आगीत काजू बागायती जळून खाक झाल्याने येथील काजू बागायतदारांचे लाखोंचे नुकसान झाले. एकंदरीत बागायतींमधील या वाढत्या आगींमुळे बागायतदार चिंतेत असून या मागे काही षडयंत्र तर नाही ना अशा चर्चा सध्या रंगू लागल्या आहेत.