SCO Summit 2023 In Goa: गोव्यात पार पडलेल्या शांघाय सहकार्य संघटनेच्या बैठकीत चीन, रशिया, पाकिस्तानसह विविध देशांचे परराष्ट्र मंत्री उपस्थित होते.

गोव्यातील बाणावली समुद्रकिनारी 04 आणि 05 मे रोजी ही बैठक पार पडली. या बैठकीला हजेरी लावलेल्या मंत्री, प्रतिनिधींना गोव्यातील खाद्यपदार्थ, संस्कृतीने भुरळ पाडली.

SCO देशांचे सर्व प्रतिनिधी गोव्यातील पाककृती, संस्कृती आणि आदरातिथ्य पाहून प्रभावित झाले, असे परराष्ट्र मंत्री एस जयशंकर यांनी रविवारी सांगितले.

दरवर्षी होणाऱ्या शांघाय सहकार्य संघटनेच्या बैठकीचे अध्यक्षपद यावर्षी भारताकडे आहे. गोव्यात झालेल्या या बैठकीला रशियाचे परराष्ट्र मंत्री सेर्गी लावरोव, चीनचे किन गँग, पाकिस्तानचे बिलावल भुत्तो-झरदारी, उझबेकिस्तानचे बख्तियोर सैदोव आणि एससीओचे सरचिटणीस झांग मिंग उपस्थित होते.

याशिवाय ताजिकिस्तानचे परराष्ट्रमंत्री सिरोजिद्दीन मुहरिद्दीन, कझाकिस्तानचे मुरात नुरटलेउ आणि किर्गिस्तानचे झीनबेक कुलुबाएव हेही या बैठकीला उपस्थित होते.

"SCO परराष्ट्र मंत्र्यांची गोव्यात मे 04-05, 2023 रोजी बैठक झाली. सर्व प्रतिनिधी गोव्यातील खाद्यपदार्थ , संस्कृती आणि आदरातिथ्य पाहून प्रभावित झाले," असे जयशंकर यांनी ट्विट केले.

"बैठकीसाठी उत्कृष्ट व्यवस्था केल्याबद्दल मुख्यमंत्री प्रमोद सावंत आणि सर्व अधिकाऱ्यांचे आभार," असे जयशंकर म्हणाले.

गोव्यात पार पडलेल्या या बैठकीत SCO सदस्य देशांचे परराष्ट्रमंत्री यांच्यात विविध मुद्यांवर चर्चा झाली. यात प्रामुख्याने दहशतवाद आणि आर्थिक संबंधावर चर्चा झाली. भारताचे परराष्ट्रमंत्री डॉ. जयशंकर यांनी सीमापार दहशतवादासह सर्वप्रकारच्या दहशतवादाला आळा घालण्याची आवश्यकता असल्याचे स्पष्ट केले. तर, पाकिस्तानचे परराष्ट्रमंत्री बिलावल भुत्तो यांनी भारत आणि पाकिस्तान यांच्यात द्विपक्षीय चर्चेसाठी पोषक वातावरण निर्माण करण्याची जबाबदारी भारताची असल्याचे मत एका मुलाखतीत व्यक्त केले.