Vishwajit Rane प्रादेशिक विकास आराखडा 2021 हा महाघोटाळाच असून एका एका प्रकरणामध्ये 500 कोटींहून अधिक रुपयांचा गैरव्यवहार झाल्याचा अंदाज आहे. यावरून हा महाघोटाळा किती कोटींचा असू शकतो, याचा अंदाज येईल.

हे लोकांसमोर मांडण्यासाठीच या संपूर्ण आराखड्याचा तपशील येत्या विधानसभेत मांडणार असल्याची माहिती नगर नियोजन व नगर विकास मंत्री विश्वजीत राणे यांनी बुधवारी ‘ट्विट’ करून दिली.

मंत्री राणे यांनी ‘ट्विट’ करत या संपूर्ण प्रकरणाची माहिती दिली आहे. मुख्य नगर नियोजक जेम्स मॅथ्यूज आणि शहर नियोजक विनोद कुमार यांच्याशी सविस्तर चर्चा केल्यानंतर या आराखड्यात अनेक बेकायदा गोष्टी घुसडल्याचे स्पष्ट झाले आहे.

राज्य स्तरावरील समितीने स्वाक्षरी केलेल्या अनेक योजना आपण पाहिल्या आहेत. यात काही सदस्यांच्या स्वत:च्या व्यावसायिक फायद्यासाठी मालमत्तेचे झोन बेदरकारपणे सेटलमेंट झोनमध्ये बदलले आहेत.

आजोशी गावात 3 लाख चौमी जंगलाचा भाग काढून त्याचे सेटलमेंटमध्ये रूपांतर केले आहे. त्याचे मूल्यमापन केल्यास 500 कोटी रुपयांहून अधिकचा हा घोटाळा आहे. विशेष म्हणजे, या सर्व भागांचे सीमांकन केले असून खासगी वनक्षेत्रे अन्य बिल्डर्सनी विकत घेतले आहेत.

त्यामुळे हा महाघोटाळाच आहे. हडफडे, आजोशी, अस्नोडा या गावांमध्ये मोठ्या प्रमाणात सेटलमेंट दाखवली असून खासगी जंगलांचा भाग रिसॉर्टमध्ये रूपांतरित केला आहे.

ही तर जनतेची फसवणूक

‘आरपी-21’मध्ये अनेक बाबी बेकायदेशीरपणे केल्या आहेत. हा महाघोटाळा होता, हे जनतेला कळावे, अशी अपेक्षा आहे. नगर नियोजकांची कोणतीही पात्रता नसलेल्या राज्यस्तरावरील समितीने जनतेची फसवणूक केली असून केवळ स्वार्थासाठी बेकायदेशीर गोष्टींना थारा दिला आहे. यासाठी मी तज्ज्ञ समितीकडून संपूर्ण व्यवहाराची चौकशी करणार आहे, असे विश्‍वजीत राणे म्हणाले.