Savoi Verem :

सावईवेरे, कलाकार नेहमीच काही तरी नावीन्यपूर्ण करण्यासाठी धडपडत असतात. आपल्या कलेत वेगळेपणा आणून आत्मिक समाधान मिळावे यासाठी ते प्रयत्नशील असतात.

सावईवेरे येथील निशान मंगलदास पालकर (२२) याने धाग्यापासून लईराई देवीची प्रतिकृती साकारली आहे. ''द ग्लो ऑफ आई लईराई'' असे नाव या कलाकृतीला दिले आहे.

निशान हा गोवा कॉलेज ऑफ आर्टचा विद्यार्थी असून उभरता कलाकार म्हणून त्याची परिसरात ओळख आहे. ही कलाकृती साकार करण्यासाठी त्याला सात दिवस लागले, असे त्याने सांगितले.

‘थ्रेड आर्ट’ संबंधी...

‘थ्रेड आर्ट’ संबंधी निशान याने सांगितले की, ही धाग्यापासून साकारली जाणारी कलाकृती आहे. सर्वप्रथम प्लायवूडवर खिळे ठोकावे लागतात. प्लायवूडवर खिळ्यांच्या साहाय्याने मार्किंग केले जाते. जो आकार काढायचा आहे, त्यानुसार खिळ्यांचे मार्किंग करणे आवश्यक असते. मग धागे सरळ रेषेत गुंडाळावे लागतात.

२६४ खिळ्यांचा वापर:

लईराई देवीची प्रतिमा साकारताना प्लायवूडवर एकूण २६४ खिळे वर्तुळाकार ठोकून काळ्या धाग्यांचा वापर केला आहे. या धाग्यांच्या आडव्या, उभ्या, तिरप्या अशा सुमारे ४ हजार रेषा आखून प्रथमच लईराई देवीची प्रतिकृती साकारली असल्याचे निशान याने सांगितले.