Mohan Bhagwat : राष्ट्रीय स्वयंसेवक संघाचे सरसंघचालक डॉ. मोहन भागवत हे आज सोमवारी गोव्यात दाखल होत आहे. दरम्यान, डॉ. मोहन भागवत ज्या रस्त्याने आज येणार आहे त्या रस्त्यावर काल रविवारी पोलिसांनी रंगीत तालीम घेतली. २ ते ७ जानेवारी दरम्यान गोव्यात राष्ट्रीय स्वयंसेवक संघाचे राष्ट्रीय अधिवेशन आयोजित करण्यात आले आहे. या अधिवेशनात संघ परिवारातील कार्यकर्त्यांना मार्गदर्शन करण्यासाठी डॉ. भागवत येत आहेत.

राष्ट्रीय स्वयंसेवक संघाचे राष्ट्रीय अधिवेशन २ ते ७ दरम्यान फोंडा तालुक्यातील नागेशी येथे होत असून या निमित्ताने विविध कार्यक्रमांचा आयोजन केल्याची माहिती संघाचे अखिल भारतीय प्रचार प्रमुख सुनील आंबेकर यांनी दिली. नागेशी येथे संघाचे राष्ट्रीय अधिवेशन होत असल्याने नागेश महारुद्र देवस्थानची रंगरंगोटी आयोजनाची सर्व तयारी देखील पूर्ण झाली आहे.

डॉ. मोहन भागवत हे दाबोळी विमानतळावरून वेर्णा, बोरी मार्गे नागेशीला येणार असल्याने या रस्त्यावर काल पोलिसांनी रंगीत तालीम घेतली. अतिमहिनीय व्यक्तींत डॉ. भागवत यांचा समावेश असल्याने त्यांना मुख्यमंत्री किंवा एखाद्या केंद्रीय मंत्र्याला जसा पोलीस बंदोबस्त पुरविला जातो. तसाच बंदोबस्त रंगीत तालमीच्यावेळी तैनात करण्यात आला होता. काही मोक्याच्या ठिकाणी मुख्य रस्त्यावरील वाहतूक सुद्धा रोखून धरण्यात आली होती.