साखळी: सगळीकडेच आठवडा बाजाराची एक पद्धत आखून दिलेली असते आणि त्याप्रमाणेच दर सोमवारी साखळीत आठवडा बाजार भरतो. पण या आठवडा बाजाराच्या दिवशी साखळी बाजारात होणारी वाहतूक कोंडी आणि परिणामी बाजारात निर्माण होणारा व्यत्यय रोखण्यासाठी नगरपरिषदेकडून चारचाकी व इतर मोठ्या वाहनांची वाहतूक आता बंद केली जाणार आहे.

बाजाराच्या दिवशी संपूर्ण बाजारात लोकांची वर्दळ असतानाच वाढणाऱ्या वाहतुकीमुळे खेळखंडोबा होत असतो आणि त्याचा त्रास बाजारात येणाऱ्या लोकांना होतो. यासाठी लोकांची मागणी लक्षात घेऊन स्थानिकांची गैरसोय दूर करण्यासाठी साखळी नगरपरिषदेतर्फे पुढाकार घेण्यात आला आहे. विर्डीतून बाजारात येणाऱ्या रस्त्यावर फाटक गेट बसवून या रस्त्यावरील वाहतूक म्हावळंगतड मार्गे वळविण्यात येणार आहे तर बाजारातही रस्ता अडवला जाईल.

वाहतूक व्यवस्था सुरळीत होण्यासाठी नरपरिषदेने आखलेल्या या साच्याचे उल्लंघन झाल्यास मात्र कारवाई केली जाईल याची सर्व वाहनचालकांनी नोंद घ्यावी व बाजार सुरळीत करण्यासाठी सहकार्य करावे, असे आवाहन नगराध्यक्षा सिध्दी प्रभू-पोरोब व उपनगराध्यक्ष आनंद काणेकर यांनी केले आहे.