Sanguem Car Accident : कुमयामळ-सांगे येथील नाईक कुटूंबियांचा पुलावरून कार नदीत कोसळून दुर्दैवी अंत झाल्याची घटना सोमवारी रात्री घडली. या अपघातातील रेखा नाईक (वय 32) आणि दोन वर्षीय दिव्यांश नाईक यांचा यांचे मृतदेह सापडले होते.

पण रेखा यांचे पती मिलिंद नाईक (वय 38) यांचा मृतदेह आढळून आला नव्हता. दरम्यान, मिलिंद नाईक यांचा मृतदेह अग्निशमन दलाला आज, मंगळवारी आढळून आला.

तारीपांटो - सांगे येथील पुलावरून जात असताना चालकाचा ताबा सुटल्याने कार पुलावरून थेट उगे नदीत कोसळून हा अपघात झाला होता. दोन तासांनंतर अग्निशमन दलाच्या जवानांनी कार नदीतून बाहेर काढली आणि कारच्या काचा फोडून मायलेकाचे मृतदेह बाहेर काढले होते. हे नाईक कुटुंबीय (जीए - 01 - आर - 9158) कारने सांगे बाजाराकडे येत होते.

या पुलाला संरक्षक कठडे नसल्याने कार थेट नदीत कोसळली. यापुर्वीही येथे अशा घटना घडल्या आहेत. स्थानिकांनी वारंवार मागणी करूनही या पुलावर कठडे बांधलेले नाहीत.