पणजी: साळपे तलावाच्या प्रदूषणाबाबत दाखल झालेल्या जनहित याचिकेचा निपटारा करताना मुंबई उच्च न्यायालयाच्या गोवा खंडपीठाने संबंधित यंत्रणांना कठोर निर्देश दिले आहेत.

तलावामध्ये सांडपाणी सोडणे तातडीने थांबवावे, तसेच पुढील काळात प्रदूषण होऊ नये यासाठी सर्व आवश्यक उपाययोजना कराव्यात, असे आदेश गोवा राज्य प्रदूषण नियंत्रण मंडळ, मडगाव नगरपालिका आणि सीवरेज इन्फ्रास्ट्रक्चर डेव्हलपमेंट कॉर्पोरेशन ऑफ गोवा लिमिटेड यांना देण्यात आले आहेत.

महाधिवक्ता देविदास पांगम यांनी सांगितले की, तलाव परिसरातील सर्व घरे आणि व्यावसायिक आस्थापनांना सांडपाणी व्यवस्थापन करण्याची सूचना देण्‍यात आली आहे.

नगरपालिका तलाव परिसरावर बारकाईने लक्ष ठेवून प्रदूषणाच्या तक्रारी तत्काळ नोंदविण्याची जबाबदारी देखील देण्यात आल्याचे त्यांनी स्पष्ट केले. ज्या खालच्या भागांमध्ये सांडपाणी पाईपलाईन टाकणे कठीण आहे, तिथे विशेष पंपिंग सिस्टम उभारण्याची सोय केली जात आहे. त्यामुळे हा प्रकल्प निश्चित कालावधीत पूर्ण करण्याचे आदेशही न्यायालयाने दिले आहेत.