ग्रामीण विकास यंत्रणा खात्यातर्फे आयोजित केलेल्या सरस या वस्तू विक्री प्रदर्शनात चायना मेड माल विकला जात असल्याचे या पुर्वी उघडकीस आणलेल्या गोवा कॅन या संघटनेने आज पुन्हा या प्रदर्शनातील त्रुटी उघड करतांना येथे खाद्य पदार्थांची करणाऱ्या स्टॉल्स वरील विक्रेते एफएसएसआयचा परवाना प्रदर्शीत न करताच ही विक्री करत असल्याच्या गोष्टीवर उजेड टाकला.

आज गोवा कॅनच्या कार्यकर्त्यानी या प्रदर्शनाला भेट देऊन पाहणी केली असता येथील कित्येक खाद्य पदार्थ स्टॉल्सवर हा परवाना प्रदर्शित न केल्याचे दिसून आले.

याबद्दल विचारणा केली असता काही जणांनी आपल्या मोबाईलवर असलेली सॉफ्ट प्रत दाखविली.

मात्र त्या प्रतची कॉपी काढून ती स्टॉल्सवर प्रदर्शित करण्यास नकार दिला. शेवटी दम भरल्यावर त्यांनी ही प्रत प्रदर्शित केली असे गोवा कॅनचे रोलांड मार्टीन्स यांनी सांगितले.

मार्टीन्स म्हणाले, जिथे जिथे असे खाद्य पदार्थ विकले जातात त्या त्या ठिकाणी या परवान्याची प्रत प्रदर्शित करणे कायद्याने अनिवार्य आहे. मात्र येथे हा कायदा पाळला जात नाही.

याबद्दल आम्हीं एसजीपीडीएचे अध्यक्ष दाजी साळकर यांच्याकडे तक्रार करणार असून त्यांच्या मैदानाचा असा बेकायदेशीर वापर केला जात आहे हे त्यांच्या लक्षात आणून देऊ असे त्यांनी सांगितले.

मागच्या आठवड्यात याच संस्थेने या प्रदर्शन स्थळी चायना मेड माल विकत असल्याचे लक्षात आणून देऊन या स्टॉल्सवर वजन व माप खात्याला छापा मारण्यास भाग पाडले होते.