Pernem News : पेडणे : चोपडे येथील श्लोका मनोहर चोपडेकर हिची टोकियो (जपान) येथे आयोजित ‘सकूरा सायन्स हायस्कूल एक्सचेंज प्रोग्रॅम’साठी निवड झाली आहे.

विज्ञान तथा तंत्रज्ञान क्षेत्रात जपानने केलेल्या नाविन्यपूर्ण प्रयोगांची माहिती विद्यार्थ्यांना देऊन विद्यार्थ्यांचे विज्ञान तथा तंत्रज्ञानविषयक ज्ञान अधिक सखोल ज्ञान देऊन प्रोत्साहन देणे हा या उपक्रमाचा हेतू आहे.

डिसेंबर महिन्यातील दुसऱ्या आठवड्यात टोकियो येथील मेट्रोपोलिटन एडमंट हॉटेलात होणाऱ्या या सात दिवसीय कार्यक्रमात देशभरातून निवड झालेल्या एकूण ४० विद्यार्थ्यांमध्ये गोव्यातील केवळ तीन विद्यार्थ्यांचा समावेश आहे. या तीन विद्यार्थ्यांत चोपडेसारख्या ग्रामीण भागातील श्लोका हिची निवड झाल्याने तिचे सर्व थरातून कौतुक होत आहे.

या कार्यक्रमात सहभागी विद्यार्थी टोकियो आणि वासेदा विद्यापीठाबरोबरच राष्ट्रीय निसर्ग आणि विज्ञान संग्रहालय, याकासुका संशोधन केंद्र, मित्सुबिशी मिनाटोमिराई औद्योगिक संग्रहालय, काझुका संशोधन संस्था मिकी हायस्कूल अशा जपानमधील नामवंत संस्थांना भेटी देणार आहेत.

मध्यमवर्गीय कुटुंबातील श्लोका हिचे प्राथमिक शिक्षण आगरवाडा येथील सातेरी प्राथमिक विद्यालयात झाले असून दहावीपर्यंतचे शिक्षण तिने आगरवाडा - पेडणे येथील जगन्नाथ अर्जुन चोपडेकर स्मृती शासकीय माध्यमिक विद्यालयातून पूर्ण केले आहे.