पणजी: गोवा आर्थिक विकास महामंडळातर्फे पणजी-रायबंदर बगलमार्गाशेजारील 2 लाख चौरस मीटर जमीन विकसित करून प्रकल्प उभारणार असल्याची माहिती महामंडळाचे अध्यक्ष सदानंद शेट तानावडे यांनी दिली.

महामंडळाच्या आज (गुरुवारी) झालेल्या महत्त्वपूर्ण बैठकीनंतर ते पत्रकारांशी बोलत होते. यावेळी त्यांनी मुख्यमंत्री रोजगार योजनेची व्याप्ती वाढवणार असल्याचे सांगून रोजगार निर्मितीसाठी प्रयत्न करणार असल्याचे स्पष्ट केले.

व्यवसायासाठी सरकारकडून प्रोत्साहन दिले जात असून, युवकांनी यापुढे नोकरीच्या मागे न धावता व्यवसायासाठी पुढे यावे. यासाठी अर्थसाहाय्य दिले जाणार असल्याचेही तानावडे यांनी सांगितले.

ते पुढे म्हणाले, आर्थिक विकास महामंडळातर्फे विविध प्रकारच्या योजना सुरू केल्या असून, यातील महत्त्वपूर्ण लोकोपयोगी योजना, राज्यातील उद्योजकांना आर्थिक साहाय्य पुरवण्याबरोबरच मुख्यमंत्री रोजगार योजना, व्यक्तिगत कर्ज योजना आणि एसटी बांधवांसाठीच्या विशेष कर्ज योजनांचा समावेश आहे. 2019-20 या सालात कोरोना संकटामुळे औद्योगिक विकासाला खीळ बसली होती. याचा परिणाम महामंडळाच्या नफ्यावर झाला होता. तर 2020-21 मध्ये संपलेल्या आर्थिक वर्षात महामंडळाला 67 कोटींचा नफा झाला असून, महामंडळाने कोरोना संकट काळात मुख्यमंत्री रिलीफ फंडासाठी 1 कोटी दिले आहेत.