केपे : केंद्रात व राज्‍यात भाजप सरकारने उत्‍कृष्‍ट कार्य केलेले आहे. तरीसुद्धा कार्यकर्त्यांनी शांत न बसता पक्षाचे कार्य तळागाळापर्यंत पोचवावे, असे आवाहन भाजप प्रदेशाध्‍यक्ष सदानंद शेट तानावडे यांनी केले.

केंद्रात भाजप सरकारने गेल्या 30 मे रोजी 9 वर्षांचा कार्यकाळ पूर्ण केल्याने राज्यात विविध कार्यक्रम आयोजित केले आहेत. त्याचाच एक भाग म्हणून ‘सेवा सुशासन व गरीब कल्याण’ या कार्यक्रमांअंतर्गत तानावडे यांनी केपे येथे भेट दिली. त्‍यावेळी ते बोलत होते.

यावेळी माजी उपमुख्यमंत्री बाबू कवळेकर, नगराध्यक्ष सुचिता शिरवईकर, जिल्हा पंचायत अध्यक्ष सुवर्णा तेंडुलकर, शाणू वेळीप, नगरसेवक दयेश नाईक, चेतन हळदणकर व कार्यकर्ते उपस्थित होते. केंद्रात भाजप सरकारने जी कामे केली आहेत, त्याची माहिती लोकांपर्यंत पोचली पाहिजे. यासाठी आम्ही या महिन्यात अनेक कार्यक्रम आयोजित केले आहेत, असे तानावडे म्‍हणाले.

बाबू कवळेकर यांच्‍यामुळेच केपेचा सर्वांगीण विकास

केपे मतदारसंघाचा विकास खऱ्या अर्थाने भाजपच्या कारकिर्दीत झाला. 2019 मध्ये जेव्हा बाबू कवळेकर यांनी भाजपमध्‍ये प्रवेश केला, त्यावेळी त्यांनी अनेक विकासकामांना सुरूवात केल. कवळेकर यांनी ज्या कामांचा पाठपुरावा करून जी कामे मंजूर करून घेतली होती, त्याची जाणीव नगरसेवक व पंचसदस्यांना असल्याने ते कवळेकर यांना त्या कामाच्‍या उद्‌घाटन कार्यक्रमांना निमंत्रण देत असता, असे तानावडे यांनी सांगितले.