म्हापसा: पर्यटन हा गोव्यातील प्रमुख व्यवसाय आहे, या पर्यटनाच्या निमित्ताने अनेक देशी तसेच विदेशी पर्यटक गोव्याच्या दिशेने येत असतात. पर्यटकांचे गोवा कायम स्वागत करत असला तरीही काहीवेळा हेच पर्यटक राज्यासाठी डोकेदुखी बनू शकतात. अलीकडेच रशियामधून आलेल्या एक पर्यटकाला पोलिसांनी ताब्यात घेतलं आहे. गेल्या अनेक दिवसांपासून हा पर्यटक गोव्यात वैध कागदपत्रांशिवाय राहत होता, पोलिसांना त्याचा पत्ता समजला असल्याने आता त्याला अटक करण्यात आली आहे.

हा पर्यटक वैध कागदपत्रांशिवाय गोव्यात राहत असल्याने त्याने विदेशी कायद्याचे उल्लंघन केले असून त्याला अटक झाली आहे. पोलिसांनी दिलेल्या माहितीनुसार, एएनसी पीएसआय मंजुनाथ नाईक यांनी दिलेल्या तक्रारीनंतर ही घटना उघडकीस आली.

९ डिसेंबर रोजी २६ वर्षीय डॅनिल किटुआकोव्ह नावाच्या एका रशियन पर्यटकाला वैध कागदपत्र नसल्याच्या आरोपाखाली बेड्या ठोकल्या. आरोपीच्या नावे फॉरेनर्स ऑर्डर १९४८ च्या कलम ७(१) आणि कलम ७(३) (iii) आणि फॉरेनर्स ऍक्ट, १९४६ च्या कलम १४ नुसार गुन्हा दाखल करण्यात आला. हणजूण पोलिसांनी दिलेल्या माहितीनुसार सध्या या प्रकरणाची पुढील तपासणी सुरु आहे.