Rumdamol Panchayat : रुमडामळ-दवर्ली पंचायत क्षेत्रात कायदा व सुव्यवस्थेचा प्रश्न निर्माण होऊ नये, यासाठी पोलिस प्रशासनाकडून आवश्यक त्या उपाययोजना केल्या जात आहेत. आगामी ईद सणाच्या पार्श्‍वभूमीवर रुमडामळ पंचायत क्षेत्रातील चार संवेदनशील जागांवर सुमारे १५ आरआयबी पोलिसांची तुकडी तैनात करण्यात येणार आहे, अशी माहिती पोलिस सूत्रांकडून देण्यात आली.

सध्या या भागात पोलिसांची गस्त सुरूच आहे. आषाढी एकादशी आणि बकरी ईद हे सण एकाच दिवशी येत आहेत. या पार्श्‍वभूमीवर पोलिस प्रशासन येथील परिस्थितीवर नियंत्रण ठेवण्यासाठी सज्ज झाले आहे. रुमडामळ येथील पंच सदस्य विनायक वळवईकर यांच्यावर चाकूहल्ला झाल्यापासून या ठिकाणचे वातावरण तंग बनले आहे.

या परिस्थितीवर पोलिसांकडून लक्ष ठेवण्यात येत आहे. त्यानंतर रविवारी सायंकाळी बीफचे दुकान खुले करण्याबाबत विचारणा केल्यानंतर मुस्लिम समुदाय रुमडामळ येथील आऊट पोस्टवर जमा झाला होता. पोलिस उपअधीक्षक संतोष देसाई यांनी समजूत काढून सर्वांना माघारी पाठवले होते. कायदा-सुव्यवस्थेचा प्रश्न उदभवल्यास पोलिसांकडून जादा कुमकही तैनात करण्यात येणार आहे.