पणजी: गेल्या काही महिन्यांपासून गोव्यातील पर्यटन घटल्याचा दावा सोशल मिडियावरुन अनेकजण करतायेत. घटत्या पर्यटनाचे खापर राज्यातील वाहतूक व्यवस्था, महागडे हॉटेल्स, खाद्यपदार्थ, वाढते गुन्हे यावर फोडण्यात आले. राज्य सरकारने मात्र पर्यटन घटल्याचा दावा खोडून काढला असला तरी सोशल मिडियावर गोवा पर्यटनाबाबत नकारात्मक सूर अद्याप सुरु असल्याचे दिसत आहे.

सोशल मिडियावरुन गोव्यातील पर्यटन दर्जा खलावला असल्याचा दावा करणाऱ्या अनेक पोस्ट व्हायरल झाल्या. यातच रि ओढत अनेकांनी त्यांना देखील गोव्यात असमाधानकारक अनुभव आल्याचे म्हटले. यात आता देशाची सेवा केलेल्या एका निवृत्त लष्करी अधिकाऱ्याने गोव्यात पर्यटनाबाबत आलेला अनुभव 'एक्स' या सोशल मिडियावरुन शेअर केला आहे. अधिकाऱ्याने गोव्याबाबत मांडलेले मत देखील नकारात्मक आहे.

मेजर जनरल राजू चौहान असे या निवृत्त लष्करी अधिकाऱ्याचे नाव आहे. गोवा पर्यटनाचे प्रामाणिक विश्लेषण असे म्हणत चौहान यांनी एक्सवर पोस्ट शेअर केली आहे. यात त्यांनी

- उद्धट चालक

- निकृष्ट जेवण आणि सेवा

- महागड्या रुम्स

- क्रूझमध्ये पैशाला किंमत नाही

- कॅसिनोत फक्त मारवाडी

अशी लिस्ट चव्हाण यांनी शेअर केली आहे. दरम्यान, समुद्रकिनाऱ्यावर कमी गर्दी असल्यामुळे ते अप्रतिम आहेत असे मत चौहान यांनी व्यक्त केले आहे.

चौहान यांच्या एक्सवरील पोस्टवर काही जणांनी मत व्यक्त केले आहे. यावर एका निवृत्त आयपीएस अधिकाऱ्याने देखील मत मांडले आहे. "गोवा सरकारने पर्यटनाबाबत व्यवस्थित जनजागृती करण्याची गरज आहे. राज्यासाठी पर्यटन हा महसूल मिळवण्याचे मुख्य साधन आहे", असे मत निवृत्त आयपीएस ढिल्लन यांनी व्यक्त केले आहे.

याशिवाय आणखी एक युझरने त्याला देखील गोव्यात वाईट अनुभव आल्याचे सांगितले. पण, गोव्यातील समुद्रकिनारे आवडल्याचे या युझरने म्हटले आहे.