पिसुर्ले: पर्ये मतदार संघात येणाऱ्या भुईपाल सत्तरी येथिल सरकारी माध्यमिक विद्यालयातील एका शिक्षकाने विद्यालयाच्या मुख्याध्यापिके विरोधात होंडा पोलिस चौकी मध्ये तक्रार केली असल्याची माहिती मिळाली आहे. सदर प्रकरणाची दखल घेऊन उद्या दि 7 रोजी चौकशी साठी त्याना वाळपई पोलिस स्थानकात बोलवण्यात आले आहे. (Rude behavior of the headmistress; Teacher's complaint to Goa police)

या संबंधी मिळालेल्या माहितीनुसार समजले की या विद्यालयाचे शिक्षक महेश नाईक यांनी सदर तक्रार दाखल केली असून, मुख्याध्यापिकेचे मानसिक संतुलन बिघडल्याने, ती आपल्याशी असभ्य वर्तणूक करीत आहे, अशा प्रकारचे आरोप केले आहे.

गेल्या तीन चार वर्षांपासून या विद्यालयाचा निकाल शिक्षक व मुख्याध्यापिका यांच्या सहकार्याने समाधानकारक लागत आहे, यामुळे येथे विद्यार्थ्यांची संख्या वाढत होती, परंतू काही दिवसांपासून येथिल शिक्षक व मुख्याध्यापिका यांच्या मधील संबंध बिघडले असल्याने आणि त्याचाच परिणाम म्हणून आज एका शिक्षकाने शिक्षण खात्याकडे तक्रार करून काहीच फायदा होत नसल्याने शेवटी थेट पोलिस ठाण्यात तक्रार दाखल केल्याने हा विषय चर्चेचा बनला आहे.

दरम्यान या विद्यालयातील सर्व शिक्षक व शिक्षकेतर कर्मचाऱ्यांनी सदर विद्यालयाच्या मुख्याध्यापिका रोझी मिनेजिस यांच्या विरोधात दि 19 मार्च 2021 रोजी मुख्याध्यापिका कडून होणारी सतावणूक तसेच सर्व शिक्षक व शिक्षकेत्तर कर्मचाऱ्यांशी गैरवर्तणूक करीत असल्याचे नमूद करून लेखी तक्रार उत्तर गोवा शिक्षण विभागाचे उपसंचालका कडे केली होती, परंतू सदर तक्रारीची कोणतीच दखल त्यावेळी शिक्षण खात्याने घेतली नसल्याने, या विद्यालयातील शिक्षक व मुख्याध्यापिका मध्ये गेल्या कित्येक दिवसांपासून सुरू असलेला वाद विकोपाला जाऊन, आता पोलिस ठाण्या पर्यंत पोहोचला आहे. या संबंधी तक्रारदार शिक्षक यांच्याशी संपर्क साधून विचारले असता त्यांनी तक्रार केली असल्याचे कबूल केले असून, या संबंधी आपल्याला न्याय मिळणार याची अपेक्षा व्यक्त केली आहे.