सार्वजनिक बांधकाम खात्याच्या एका कनिष्ठ अभियंत्याच्या (PWD Junior Engineer) पायावरून रोड रोलर मशीन नेल्याची धक्कादायक घटना समोर आली आहे. घोडके बाळ्ळी येथे शुक्रवार, 20 जानेवारी रोजी ही घडली.

दयानंद फळदेसाई (59) असे या अभियंत्याचे नाव आहे. फळदेसाई यांच्या उजव्या पायाला गंभीर दुखापत झाली असून, त्यांना उपचारासाठी गोमेकॉत दाखल करण्यात आले आहे.

याप्रकरणी रोड रोलर चालक आंतोनियो फर्नांडिस याच्याविरोधात गुन्हा दाखल करण्यात आला आहे.

मिळालेल्या माहितीनुसार, संशयित फर्नांडिस हा रोड रोलर मशीनचा ऑपरेटर असून, त्याने निष्काळजीपणे रोड रोलर फळदेसाई यांच्या उजव्या पायावर चलविला. शुक्रवारी दुपारी 2:30 वाजता येथील घोडके बाळ्ळी येथील रेल्वेगेटजवळ ही घटना घडली.

कुंकळ्ळी पोलिस ठाण्यात (Cuncolim Police Station) याप्रकरणी आंतोनियो फर्नांडिस याच्याविरुद्ध गुन्हा नोंद झाला असून, पोलिस निरीक्षक तुकाराम चव्हाण यांच्या मार्गदर्शनाखाली हवालदार गणू पागी हे पुढील तपास करीत आहेत.