Bad Road Condition: वाळपई मार्गावरील रेडेघाट, भुईपाल तसेच होंडा येथील रस्ता खड्डेमय झालेला आहे. यामुळे वाहन चालकांना अनेक स्तरावर डोकेदुखी सहन करावी लागत आहे. गेले कित्येक महिने प्रवाशांना या खड्ड्यातून वाट काढावी लागत आहे. यामुळे सार्वजनिक बांधकाम खात्याने या रस्त्याचा प्रस्ताव त्वरित मंजूर करावा, अशी मागणी वाहन चालकांतर्फे करण्यात येत आहे.

रेडेघाट, भुईपाल तसेच होंडा मार्गावर मधोमध अनेक ठिकाणी रस्ता सध्या अत्यंत बिकट अवस्थेत आहे. हा रस्ता मुख्य असल्याने मोठ्या प्रमाणात वाहनांची ये-जा असते. रस्त्यावरील खड्डे चुकवताना अनेक स्तरावर अपघात होताना दिसतात. वाळपई रेडेघाट रस्त्यावर गेल्या वर्षी खड्डे मधोमध बुजविण्यात आले होते.

त्याचबरोबर काही दिवसापूर्वी खड्डे पडलेल्या जागी खड्डे बुजविण्यात आले होते. मात्र या सर्वांचा काहीच फायदा झालेला नाही. कारण आता अनेक ठिकाणी बारीक मोठे खड्डे पडण्याचे प्रमाण वाढले आहे. रेडेघाट हा मार्ग वळणावर असल्याने खड्ड्यांमुळे अनेक स्तरांवर वाहनचालकांना धोकादायक प्रवास करावा लागतो. अनेकवेळा पाऊसात खड्ड्याचा अंदाज येत नाही. त्यामुळे अपघात सुध्दा होतात.

वाळपई भागात ज्या ज्या ठिकाणी मधोमध खड्डे पडलेले होते. त्या ठिकाणी खड्डे बुजविण्यात आले आहे. मात्र हे बुजविलेले खड्डे काही दिवसातच गायब होतात व पुन्हा खड्डे पडतात. कोपार्डे येथे सुध्दा नव्याने करण्यात आलेला रस्त्यावर सुमारे दिड किलो मीटरच्या अंतरावर हॉटमिक्स करण्यात आलेले नाही. त्यामुळे पुन्हा पुन्हा रस्त्यावर खड्डे पडत आहे. दिवाळी नंतर या मार्गावर हॉटमिक्स करण्यात येण्याची शक्यता आहे.