मोरजी: चोपडे मार्गे शिवोलीकडे भरधाव वेगाने जात असलेल्या पर्यटकांच्या कारने रस्त्यालगत उभ्या केलेल्या ट्रकला शुक्रवारी पहाटे जबरदस्त धडक दिली. या अपघातात झारखंडमधील मिलिंद उज्ज्वल सिन्हा (वय ४५) यांचा जागीच मृत्यू झाला, तर त्यांची पत्नी स्मिता सिन्हा किरकोळ जखमी झाली आहे.

मिळालेल्या माहितीनुसार, सिन्हा दाम्पत्य सुट्ट्यांनिमित्त गोव्यात पर्यटनासाठी आले होते. शुक्रवारी पहाटे ते चोपडे मार्गे शिवोलीकडे कारने जात असताना चालकाचा वाहनावरील ताबा सुटल्याने अपघात घडला.

कारने प्रथम रस्त्यालगत असलेल्या संरक्षक भिंतीला धडक दिली आणि त्यानंतर तेथेच पार्क केलेल्या ट्रकला जोरदार धडक बसली. या भीषण धडकेत कारचा पुढचा भाग पूर्णतः चुराडा झाला. घटनास्थळीच मिलिंद सिन्हा यांचा मृत्यू झाला असून त्यांच्या पत्नीला जखमा झाल्या आहेत.

अपघातानंतर स्थानिकांनी तत्काळ पोलिसांना कळवून बचावकार्य सुरू केले. पोलिसांनी मृतदेह ताब्यात घेऊन तो शवविच्छेदनासाठी स्थानिक सरकारी रुग्णालयात पाठविला आहे. पुढील तपास शिवोली पोलिस करत आहेत.