गोव्यात 2027 च्या आगामी निवडणुकीत भारतीय जनता पक्षाला (BJP) रिव्हॅल्युशनरी गोवन्स पार्टी हा एकमेव विरोधक असेल, तसेच आरजीपी कुणाचीही 'बी' टिम नाही. असा खुलासा रिव्हॅल्युशनरी गोवन्स पार्टीचे (RGP) अध्यक्ष मनोज परब (Manoj Parab) यांनी केला. महाराष्ट्रातील प्रादेशिक पक्षाच्या प्रमुखांना भेटल्यानंतर परब गोव्यात दाखल झाले आहेत.

मनोज परब यांनी काही दिवसांपूर्वी महाराष्ट्रातील प्रादेशिक पक्षांच्या प्रमुखांची भेट घेतली. सुरूवातीला परब यांनी महाराष्ट्र नवनिर्माण सेनेचे अध्यक्ष राज ठाकरे यांची भेट घेतली. त्यानंतर परब शिवसेना शिंदे गटाचे प्रमुख आणि महाराष्ट्राचे मुख्यमंत्री एकनाथ शिंदे यांची देखील भेट घेतली. मनोज परब यांच्या या भेटीनंतर राजकीय वर्तुळात विविध चर्चांना ऊत आले. दरम्यान, या सर्वांवर मनोज परब यांनी आपली भुमिका स्पष्ट केली आहे.

काय म्हणाले मनोज परब

"रिव्हॅल्युशनरी गोवन्स पार्टी फक्त प्रादेशिक पक्षाच्या प्रमुखांना भेटली. प्रादेशिक पक्षांची भुमिका आणि योजना जाणून घेण्यासाठी ही भेट होती. आम्ही आमच्या विचारधारेशी कोणतीही तडजोड करणार नाही. पोगो बिल पुन्हा घेऊन येण्यासाठी आम्ही प्रयत्न करणार आहोत. आरजीपी कोणत्याही पक्षाची बी टिम नाही. गोव्यात 2027 च्या आगामी निवडणुकीत भारतीय जनता पक्षाला (BJP) रिव्हॅल्युशनरी गोवन्स पार्टी हा एकमेव विरोधक असेल. 2027 मध्ये भाजप विरूद्ध आरजीपी अशीच लढत असेल."