पणजी: रिव्हॉल्युशनरी गोवन्स पक्ष नेमका कुणाचा? यावरून आमदार वीरेश बोरकर आणि अजय खोलकर–विश्वेश नाईक या दोन गटांत जुंपलेली असतानाच, पक्षाचे राष्ट्रीय अध्यक्ष असल्याचा दावा करणाऱ्या बोरकरांनी मंगळवारी प्रवीण हळर्णकर यांच्या अध्यक्षतेखाली पक्षाच्या शिस्तपालन समितीची स्थापना केली.

त्यानंतर काहीच तासांत हळर्णकर यांनी विश्वेश नाईक यांना नोटीस जारी करीत येत्या २९ जुलै रोजी चौकशीस उपस्थित राहण्याचे निर्देश जारी केले. पण, त्‍याआधीच विश्‍‍वेश नाईक यांनीही पक्षाला ‘रामराम’ ठोकला आहे.

बोरकर यांनी स्थापन केलेल्या शिस्तपालन समितीत नीतेश भंडारी आणि केविन ए. कोरिया यांची सदस्य म्हणून नेमणूक करण्यात आली आहे. पक्षांतर्गत शिस्तविषयक सर्व बाबींचे निराकरण पक्षाची घटना आणि नैसर्गिक न्यायाच्या तत्त्वांना अनुसरून करणे हा या समितीच्या स्थापनेमागील उद्देश आहे.

आचारसंहितेचे उल्लंघन यांसारख्या प्रकरणांची चौकशी करण्याची जबाबदारी या समितीवर सोपवण्यात आली आहे. ही समिती सर्व प्रकरणांची स्वतंत्रपणे तपासणी करेल आणि योग्य कार्यवाहीसाठी आपले निष्कर्ष व शिफारसी सक्षम प्राधिकरणाकडे सादर करेल, असे आमदार बोरकर यांनी जारी केलेल्या आदेशात म्हटले आहे.

विश्‍वेशच्या नोटिशीमध्ये काय

ज्या आरोपांबाबत तुम्हाला पक्षाने निलंबित केलेले होते, त्याबाबत स्पष्टीकरण देण्यासाठी २९ जुलै रोजी सकाळी १० वाजता स्वतः, अधिकृत वकील अथवा प्रतिनिधीमार्फत घर क्र. ७६४/२, मालवाडा, आगाशी, तिसवाडी, गोवा येथे होणाऱ्या सुनावणीसाठी उपस्थित राहा. पुरेशा कारणाशिवाय सुनावणीसाठी उपस्थित राहण्यास तुम्ही अपयशी ठरल्यास उपलब्ध माहितीच्या आधारे प्रकरणाची पुढील कार्यवाही करण्याचा आणि निर्णय घेण्याचा अधिकार समितीला असेल. योग्य निर्णय घेण्यापूर्वी समिती तुमची बाजू ऐकून घेईल’’, असे पक्षाने विश्‍‍वेश नाईक यांना जारी केलेल्‍या नोटिशीत म्‍हटले होते.