पणजी: रिव्हॉल्युशनरी गोवन्स पक्षाच्या (आरजीपी) अध्यक्ष मनोज परब यांच्याविरोधात चुकीची व बदनामीकारक माहिती सोशल माध्यमातून पसरवणाऱ्या व्हिडिओविरोधात पक्षाने बुधवारी रायबंदर येथील सायबर गुन्हे शाखेत तक्रार दाखल केली. पक्षाचे सरचिटणीस विश्वेश नाईक यांच्याकडून ही तक्रार दाखल करण्यात आली आहे.

नाईक यांनी तक्रारीत नमूद केले आहे की, सोशल मीडियावर एक बनावट आणि चुकीचा व्हिडिओ प्रसारित करण्यात आला आहे. या व्हिडिओमध्ये ''भरत परब'' नावाच्या व्यक्तीला मनोज परब यांचे वडील असल्याचा खोटा दावा करून अष्टगंध क्रेडिट सोसायटी प्रकरणाशी त्यांचा संबंध दर्शविण्यात आला आहे.

आरजीपीने स्पष्ट केले की, या व्हिडिओतील व्यक्तीचा मनोज परब यांच्याशी कोणताही नातेसंबंध नाही आणि त्यांच्या वडिलांचा अशा कोणत्याही गैरव्यवहाराशी काहीही संबंध नाही. तक्रारीसोबत पक्षाने संबंधित व्हिडिओचे स्क्रीनशॉट, लिंक आणि इतर पुरावे सायबर पोलिसांना दिले आहेत.

पक्षाने म्हटले आहे की, या प्रकारामुळे पक्षाची आणि नेत्यांची सार्वजनिक प्रतिमा मलिन करण्याचा प्रयत्न करण्यात आला आहे आणि हे गंभीर स्वरूपाचे सायबर गुन्हेगारीचे प्रकरण आहे.

व्हिडिओ तयार करणारे आणि प्रसारित करणाऱ्यांची ओळख पटवून त्यांना चौकशीसाठी पाचारण करावे अशी मागणी तक्रारीत करण्यात आली आहे.

तसेच युट्युब व अन्य सोशल मीडिया प्लॅटफॉर्म्सना व्हिडिओ तत्काळ हटविण्याचे निर्देश द्यावेत, संबंधितांवर कायदेशीर कलमांखाली गुन्हे नोंदवून कठोर कारवाई करण्यात यावी, व्हॉट्सअ‍ॅप/फेसबुकवरील पोस्ट्सचा डिजिटल मागोवा घेऊन आयपी लॉग्स आणि अ‍ॅडमिनची माहिती गोळा करावी आणि खोटी व बदनामीकारक माहिती पसरवणाऱ्या ग्रुप्स व युट्युब चॅनेल्सना इशारा देऊन सायबर जनजागृती नोटीस पाठवावी, अशी मागणी तक्रारीद्वारे करण्यात आली आहे.पोलिसांनी पुढील तीन दिवसांत पक्षाला चौकशीसाठी बोलावले जाईल, असे खात्रीपूर्वक आश्वासन दिल्याचे पक्षावतीने सांगण्यात आले.