पणजी : रिव्होल्युशनरी गोवन्सचे (आरजी) पोगो विधेयक लोकांना फसवित आहे. आरजी हे विधेयक केवळ नावासाठी विधानसभेत पाठवणार, आरजीने विधेयक मांडायला घाई केली आणि आम आदमी पक्षाला अजिबात विश्‍वासात घेतले गेले नाही, असे ॲड. अमित पालेकर सांगतात. ॲड. पालेकर यांनी केलेल्या विधानाचा आरजीचे प्रमुख मनोज परब यांनी गुरुवारी पत्रकार परिषद घेऊन समाचार घेतला. त्याचबरोबर त्यांनी पालेकर यांना विविध सल्लेही दिले.

परब म्हणाले की, ज्या मतदारसंघातून पालेकर निवडणूक लढवितात, त्या सांताक्रूझ मतदारसंघातील इंदिरानगरातील अतिक्रमणावर त्यांनी बोलावे. मनोज परब म्हणाले की, कलम 19 अंतर्गत देशात कोणीही कोठेही राहू शकतात, असे पालेकर सांगतात आणि पोगो विधेयकाला विरोध करताना आपच्या आमदाराने 80 टक्के गोवेकरांसाठी राखीवता मागितली आहे. यावरून पालेकर वेगवेगळी मते व्यक्त करताना दिसतात. गोव्यातील जनतेसाठी पोगो बिल आणायला हवे म्हणून तुम्ही एका बाजूला सांगता. पालेकर यांनी कलम 19 आणि गोवन्स कोण? हे स्पष्ट करावे.

‘पालेकरांनी मंजूर विधेयके वाचावीत’

जुने गोवे येथील बांधकामाविरोधात पालेकर यांनी आंदोलन केले, पण ते बांधकाम अजूनही तसेच आहे, हे पालेकर यांना लक्षात येत नाही का? हरियाणा सरकारने 75 टक्के स्थानिकांना आरक्षण दिले आहे. आंध्र प्रदेशानेही अशा आरक्षणाचे विधेयक मंजूर केले आहे. पालेकर यांनी दोन्ही राज्य सरकारची मंजूर विधेयके वाचावीत, असेही परब यांनी त्यांना सूचवले आहे.