सत्तरी: सत्तरी तालुक्यातील पडोसे गावात पुन्हा एकदा गोळीबाराची घटना घडल्याने परिसरात एकच खळबळ उडाली. याच ठिकाणी गेल्या महिन्यात गोळीबाराची एक घटना ताजी असताना गुरुवारी रात्री (27 नोव्हेंबर) पुन्हा त्याच ठिकाणी गोळीबार झाला. या घटनेमुळे पडोसे गावातील सुरक्षा व्यवस्थेवर प्रश्नचिन्ह निर्माण झाले. गेल्या महिन्यात पडोसे येथे झालेल्या पहिल्या घटनेत एका मजुराला गोळी लागून तो जखमी झाला होता. या घटनेचा तपास सुरु असतानाच गुरुवारी रात्री त्याच परिसरात पुन्हा गोळीबार झाल्याची माहिती वाळपई पोलिसांना मिळाली.

वाळपई पोलिसांची कारवाई

घटनेची माहिती मिळताच वाळपई पोलिस तातडीने घटनास्थळी पोहोचले आणि त्यांनी कसून तपासणी सुरु केली. पोलिसांनी या प्रकरणी त्वरित कारवाई करत एका व्यक्तीला ताब्यात घेतले. सध्या त्याची कसून चौकशी सुरु आहे. पोलिसांनी ताब्यात घेतलेल्या व्यक्तीकडून घटनास्थळावरुन काही आक्षेपार्ह वस्तू जप्त केल्या. जप्त केलेले साहित्यामध्ये एअरगन आणि एअरगनची काडतुसे आहेत.

एअरगन ही सामान्य बंदुकीपेक्षा वेगळी असली तरी, ती ही मोठ्याप्रमाणात इजा पोहोचवू शकते. पोलिसांनी यापूर्वीच्या गोळीबाराच्या घटनेशी या दुसऱ्या घटनेचा काही संबंध आहे का, या दिशेने तपास सुरु केला आहे. दुसऱ्यांदा गोळीबार झाल्यामुळे पडोसे गावातील लोक भयभीत झाले आहेत. पोलीस सध्या या घटनेमागील नेमका उद्देश आणि ताब्यात घेतलेल्या व्यक्तीचा सहभाग यासंबंधी अधिक तपास करत आहेत. सत्तारीसारख्या (Sattari) ग्रामीण भागात अशा प्रकारे वारंवार गोळीबाराच्या घटना घडणे हे गंभीर आव्हान आहे.