Mapusa Municipality: म्हापसा येथील पालिकेच्या आथाईद ग्रंथालय इमारतीच्या पुनर्बांधणीचे व जीर्णोद्धाराचे काम सुरू असून, हे काम डिसेंबरच्या मध्यापर्यंत पूर्ण होण्याची शक्यता आहे. यास्थळी म्हापसेकरांना आधुनिक सुविधा उपलब्ध करुन दिल्या जातील.

यासंदर्भात, आमदार जोशुआ डिसोझा यांच्याशी संपर्क साधला असता ते म्हणाले की, प्लास्टरिंगचे काम सुरू आहे. यावर्षी डिसेंबरच्या मध्यापर्यंत काम पूर्ण होण्याची अपेक्षा आहे. पालिकेच्या जुन्या पालिका ग्रंथालय इमारतीची मी लवकरच पाहणी करणार आहे.

जुन्या म्हापसा नगरपालिका इमारतीच्या पुनर्बांधणीचे व जीर्णोद्धाराचे काम सध्या गोवा राज्य नागरी विकास एजन्सीद्वारे (जीसुडा) घेतले आहे. एजन्सीकडून या शंभर वर्षांपेक्षा जास्त जुन्या वास्तूला नवीन झळाली देण्याचे काम चालू आहे.

ई-ग्रंथालयाची व्यवस्था

काम पूर्ण झाल्यानंतर आधुनिक सुविधेसह समर्पित वाचनालय तसेच ई-ग्रंथालयाची याठिकाणी व्यवस्था असेल. तसेच, तरुण व लहान मुलांसाठी सुविधेची निर्मिती केली जाईल. हे काम पूर्ण झाल्याने ते लोकांसाठी खुले केले जाईल.