Dangerous Trees in Bicholim: अत्यंत धोकादायक असलेल्या डिचोली शहरातील काही झाडांवर संक्रांत येणार आहे. पावसाळ्यातील प्रतिबंधात्मक उपाययोजना आणि आपत्ती टाळण्यासाठी धोकादायक झाडे तोडण्यात येणार आहेत.

आपत्कालीन व्यवस्थापन अंतर्गत आमदार डॉ. चंद्रकांत शेट्ये यांच्या मार्गदर्शनाखाली गेल्या आठवड्यात झालेल्या प्रशासकीय बैठकीत धोकादायक झाडांचा विषय चर्चेत आला होता. धोकादायक झाडांची पाहणी करून कोसळण्याच्या अवस्थेत असलेली झाडे तोडावीत, असे निर्देशही आमदार डॉ. शेट्ये यांनी उपजिल्हाधिकारी श्री. कासकर यांना दिले होते.

मंगळवारी दुपारी वन आणि कृषी खात्याच्या अधिकाऱ्यांनी शहरातील पिराची कोंड आणि मांद्रेकरवाडा येथील धोकादायक झाडांची पाहणी केली. यावेळी नगरसेविका ॲड. रंजना वायंगणकर उपस्थित होत्या. पाहणीवेळी अधिकाऱ्यांना किमान आठ ते नऊ झाडे धोकादायक अवस्थेत असल्याचे आढळून आले आहे, अशी माहिती मिळाली आहे.

पिराची कोंड येथील झाडे कापा

पिराची कोंड येथे तर काही झाडे घरांना टेकून उभी आहेत. एखादे झाड कोसळल्यास मोठी आपत्ती कोसळण्याची शक्यता नाकारता येत नाही. गेल्या रविवारी (ता.11) बेतकी येथे झाड कोसळून झालेल्या दुर्घटनेच्या पार्श्वभूमीवर धोकादायक झाडे असलेल्या परिसरातील लोकही भयभीत झाले आहेत. धोकादायक झाडे कापून लोकांमधील भय दूर करावा, अशी मागणी नगरसेविका ॲड. रंजना वायंगणकर यांनी केली आहे.