डिचोली: शहरातील कदंब बसस्थानकावरील दुकानांचे अखेर पर्यायी गाळ्यांत स्थलांतर सुरु झाले असून, दुकानदारांनी सध्याची दुकाने खाली करण्याचे काम हाती घेताना दुकाने खाली केली आहेत. बसस्थानकावरील दुकानांचे पर्यायी जागेत स्थलांतर झाल्यानंतर लगेचच नवीन बसस्थानक प्रकल्पाला गती मिळणार आहे. चालू आठवड्यापर्यंत सध्याचे बसस्थानक मोडण्याचे काम हाती घेण्यात येणार आहे. शहरातील सध्याचे बसस्थानक मोडून नवीन अत्याधुनिक बसस्थानक प्रकल्प उभारण्यात येणार आहे. मात्र सध्याच्या बसस्थानकावरील नऊ दुकानांचे स्थलांतर केल्याशिवाय हे बसस्थानक मोडण्याचे काम अडून राहिले आहे. गोवा राज्य साधनसुविधा मंडळातर्फे सुसज्ज असे अत्याधुनिक बसस्थानक उभारण्यात येणार आहे.

ऊन, पावसापासून सुरक्षा हवी

ज्या ठिकाणी गाळे बांधले आहेत, त्या ठिकाणी मात्र ऊन, पावसापासून सुरक्षा मिळावी त्यासाठी गाळ्यांच्या समोरून विशेष व्यवस्था करण्यात आलेली नाही. नवीन बसस्थानक पूर्ण होईपर्यंत याच जागेत बस थांबा असणार आहे. त्यामुळे ऊन, पावसापासून उपद्रव सहन करावा लागणार आहे, असे काही दुकानदार आणि प्रवाशांचे म्हणणे आहे.

दुकानदारांसाठी पर्यायी गाळे

सध्याच्या बसस्थानकावरील नऊ दुकानांचे स्थलांतर करण्यासाठी बसस्थानकावरील एका कोपऱ्यात पर्यायी गाळे बांधण्यात आले आहेत. गेल्या 6 एप्रिल रोजी जीएसआयडीसी आणि कदंब महामंडळाच्या अधिकाऱ्यांसमवेत डिचोलीचे आमदार डॉ. चंद्रकांत शेट्ये यांनी पाहणी करून गाळ्यांचे काम तीव्रगतीने पूर्ण करण्याचे निर्देश कंत्राटदाराला दिले होते. त्यानंतर बांधकामाला गती देऊन गाळ्यांचे काम एकदाचे पूर्ण केले आहेत.