Mapusa Sexual Assault: म्हापशातील एका अल्पवयीन मुलीला लग्नाच्या भुलथापा देऊन तिच्यावर बलात्कार केल्याची घटना समोर आली आहे. संबंधित मुलगी 17 वर्षांची आहे. या प्रकरणी म्हापसा पोलिसांनी बलात्काराचा गुन्हा दाखल केला आहे.

पोलिसांनी दिलेल्या माहितीनुसार संबंधित पीडीत मुलीच्या आईने पोलिसांत तक्रार दिली आहे. त्यानुसार पीडीत मुलीने पोटात दुखत असल्याचे घरात सांगितले होते. तिला वारंवार पोटदुखीचा त्रास होऊ लागल्याने आईने तिला दवाखान्यात नेले.

तेव्हा डॉक्टरांच्या तपासणीत संबंधित मुलगी गर्भवती असल्याचे उघड झाले. याबाबत मुलीच्या आईला विश्वासात घेऊन विचारले असता मुलीने तिच्यासोबत घडलेला प्रकार सांगितला. जानेवारीमध्ये मोहम्मद सादिक मुल्ला (वय 26) या पणजीतील युवकाने पीडीत मुलीवर बलात्कार केल्याची घटना घडली होती.

दरम्यान, आता पीडीत मुलीच्या आईने याबाबत पोलिसांत तक्रार दाखल केली आहे. त्यानंतर म्हापसा पोलिसांनी संशयित मोहम्मद सादिक मुल्ला याला अटक केली आहे. न्यायालयाने संशयिताला दोन दिवसांची पोलिस कोठडी सुनावली आहे.

पोलिसांनी संशयित मोहम्मद मुल्ला याच्याविरोधात कलम 376 आणि पॉस्को कायद्याअंतर्गत गुन्हा नोंदवला आहे.