डिचोली : निवडणूक न लढवण्याचा निर्णय सभापती राजेश पाटणेकर यांनी मागे घ्यावा, यासाठी भाजपचे मंडळ पदाधिकारी तसेच कार्यकर्त्यांनी त्यांची मनधरणी केली. मात्र, सभापती आपल्या निर्णयावर ठाम आहेत. राजेश पाटणेकर यांच्या निवडणूक न लढवण्याच्या निर्णयामुळे भाजपसमोर डिचोलीत मोठी अडचण निर्माण होण्याची शक्यता आहे. राजेश पाटणेकरांनी निवडणूक न लढवणे हा भाजपसाठी एक मोठा धक्का आहे.

सभापती राजेश पाटणेकर (Rajesh Patnekar) यांचे मन वळवण्याचा प्रयत्न बुधवारी मंडळ पदाधिकाऱ्यांसह सर्व संलग्न संघटनांच्या कार्यकर्त्यांनी केला. मात्र, पाटणेकर यांनी त्यांना विनम्रपणे नकार दिला. आपला निर्णय अंतिम असल्याचे सांगत त्यांनी कार्यकर्त्यांचे दाखवलेल्या विश्वासाबद्दल त्यांचे आभार मानले. त्यामुळे राजेश पाटणेकर यांच्या निवडणूक न लढवण्यावर शिक्कामोर्तब झालं आहे. असं असलं तरीही राजेश पाटणेकरांच्या जागी नवा उमेदवार देऊन तो निवडून आणण्याचं आव्हान भाजपसमोर (BJP) आहे.

निवडणूक (Goa Assembly Elections) न लढवण्यामागे प्रकृती अस्वास्थ्याचे कारण दिले तरी पाटणेकर कार्यकर्त्यांशी ताजेतवाने असल्याचे दिसत होते. यामुळे त्यांच्या नकारामागचे कारण वेगळेच असल्याच्या संशयास पुष्टी मिळाल्याची प्रतिक्रिया काही कार्यकर्त्यांनी दिली. दरम्यान अपक्ष उमेदवार डॉ. चंद्रकांत शेट्ये यांनी भाजपमध्ये यावे यासाठी त्यांना राजी करण्याचे यत्न भाजपच्या राज्यस्तरीय नेत्यांनी सुरुच ठेवले आहेत.